AQSh-tyń Kaliforniiadaǵy Federaldy apelliatsiialyq soty Hrapýnovqa qarsy iste Qazaqstan Respýblikasynyń ustanymyn qoldady. Bul jaiynda QR Ádilet ministrliginiń resmi ókili Oljas Ramazanov málim etti, dep habarlaidy "Ult aqparat".
Ramazanov taratqan aqparatta 2014 jyly Almaty qalasynyń ákimdigi Kaliforniia (AQSh) shtatynyń sotyna qalanyń burynǵy ákimine, onyń otbasy músheleri men olardyń AQSh-ta jáne basqa da elderde tirkelgen jalǵan kompaniialaryna qarsy talap aryz bergen bolatyn.
«Talap aryz Uiymdasqan qylmyspen jáne jemqorlyqpen kúres týraly zańnamany, Almaty qalasy turǵyndarynyń jaily ómirin qamtamasyz etýdegi óz mindettemelerin buzý, ózgeniń múlkin zańsyz ielený jáne atalǵan maqsatta qylmystyq ymyraǵa barýdy qamtityn sotqa aryz berýshilerdiń quqyǵyn qorǵaý týraly alty talaptan turady. Hrapýnovtar jáne olardyń jalǵan kompaniialary Almaty qalasy biýdjetinen urlanǵan qarjyny paidalana otyryp, Kaliforniiadan jyljymaityn múlik nysandaryn, qymbat avtomobilderdi menshikke satyp alǵan», - dedi ministrliktiń resmi ókili.
Onyń sózine qaraǵanda, Almaty qalasynyń aryzyn Kaliforniia shtatynyń aimaqtyq soty qabyldamaǵan. Sot atalǵan istiń mán-jaiyn anyqtaýda AQSh qolaily oryn sanalmaityndyǵy týraly qorytyndy shyǵarǵan. Osydan keiin Almaty qalasynyń ákimdigi men elimizdiń Ádilet ministrligi Kaliforniia shtatynyń apelliatsiialyq sotyna narazylyq joldaǵan. Ekinshi satydaǵy sot Qazaqstan Respýblikasynyń ótinishhatyn qoldap, tómengi satydaǵy Aimaqtyq sottyń sheshimin joiǵan.
«Qazaqstan Respýblikasy AQSh sotyn óz ustanymynyń durystyǵyna kóz jetkizdirdi. Bul sheshim jemqorlyqpen kúrestegi tabandy jumystardyń nátijesi sanalady. Endigi ýaqytta Almaty qalasynyń Hrapýnovqa qarsy talap aryzy Kaliforniia shtatynyń sotynda qaralatyn bolady. Ádilet ministrligi úilestirý jumystaryn atqarady. AQSh-taǵy zańgerlik keńesshi - Latham&Watkins LLP firmasy», - dep jazdy Oljas Ramazanov.
