Sársenbi kúni keshke Kaliforniia shtatynda bolǵan qantógistiń saldarynan tórt adam kóz jumdy, taǵy ekeýi jaralandy, dep habarlaidy USA Today.
Politsiia Los-Andjelestiń ońtústik-shyǵysynda ornalasqan kórshiles Garden-Groýv jáne Santa-Ana qalalarynda eki saǵattyń ishinde birneshe adamǵa shabýyl jasady degen kúdikpen 33 jastaǵy er adamdy tutqyndady.
Garden-Groýv qalashyǵy politsiiasynyń málimetinshe, kúdikti adamdardy tonamaq bolyp bas salǵan. Politsiia qaskóidi Santa-Ana qalasynda ustady. Munda ol dúkenniń kúzetshisin óltirgen. Kaliforniia shtatynyń biligi kúdiktiniń izine onyń sur tústi «Mersedes» kóliginiń júrgen jerin anyqtaý arqyly túsip, dúken janyndaǵy turaqtan tapqan.
Politsiia qyzmetkerleri er adamnyń óte ashýly bolǵanyn jáne kóp adamǵa shabýyl jasaǵanyn aitty.
Politsiiaǵa eń alǵashqy qońyraý páterden túsken. Onda ury túsip, bir adam jaralanǵany habarlanǵan. Kúdikti páter tonaǵan turǵyn úide taǵy eki adamdy óltirgen. Ekeýiniń biri balkonnan pyshaqtalǵan kúiinde tabylsa, ekinshisi aýrýhanada kóz jumdy.
Alaida kúdikti munymen toqtap qalmaǵan. Ol toqash satatyn dúkendi, chekti qolma-qol aqshaǵa ainaldyratyn kompaniiany, saqtandyrý kompaniiasyn tonap, bankte áiel adamǵa birneshe ret pyshaq suqqan.
Sondai-aq, qylmysker janarmai quiý stansasynda er adamdy bas salyp, murnyn kesip ala jazdaǵan. Janarmai quiý beketiniń mańyndaǵy meiramhananyń qyzmetkeri de kúdiktiniń taǵy bir qurbanyna ainaldy.
Politsiia barlyq zardap shekkender men kúdikti latynamerikalyq azamattar ekenin rastady.
