Jańarǵan ult, jańǵyrǵan eldiń jetistigin jahanǵa tanystyra alady. Mundai pikirdi jazýshy, jýrnalist «Almaty aqshamy» gazetiniń bas redaktory Qali Sársenbai bildirdi, dep habarlaidy QazAqparat.
«Parlament palatalarynyń birlesken otyrysynda Qazaqstan Prezidenti Qasym-Jomart Toqaev halyqqa Joldaý jasady. Prezident Joldaýynda ulttyq degen uǵymǵa erekshe mán berdi. Demek, qandai irgeli sala bolmasyn ol eń aldymen ultqa qyzmet etýge tiis. Ol sonda ǵana óziniń ulttyq mártebesine laiyq bola alady. Iaǵni, barlyq sala jańǵyrýy, jańarýy kerek. Jańarǵan ult qana, jańǵyrǵan eldiń jetistigin jahan jurtyna tanystyra alady»,– deidi Qali Sársenbai.
Sonymen qatar, jýrnalist jańǵyrýdyń tetikterine toqtaldy.
«Prezident bul baǵyttaǵy mindetterdi bárimizge kórsetip, aityp berdi. Qazirgi mindet - halqymyzdyń jańa bolmysyn qalyptastyrý. Tutas ult saiasatyn arttyrý. Adam jáne qoǵamdy ýaqyt talabyna sai jetildirý kerektigin ómirdiń ózi kórsetip otyr. Halyymyzdyń birtýar tulǵalarynyń sózine zor mán beretin Qasym-Jomart Kemeluly bul joly ult ustazy Ahmet Baitursynovtyń myna sózin keltirdi: «Bilimdi bolýǵa oqý kerek. Bai bolýǵa kásip kerek. Kúshti bolýǵa birlik kerek. Osy kerekterdiń jolynda jumys isteý kerek», – deidi Ahań. Memleket basshysynyń Ahmet Baitursynovty aitqany, alashty aitqany dep bilý kerek. Demek, Alash ideiasyn tiriltip otyr. Ádette, qoǵamda ulttyq ideia bar ma, ulttyq ideologiia qai deńgeide, degen saýal mazalap keledi. Atalmysh Joldaýda osy suraqqa naqty jaýap berildi», – dep túiindedi jazýshy.
