Memleket basshysy Qasym-Jomart Toqaevtyń Joldaýynda halyq pen bilik arasyndaǵy dialogqa basa mán berildi. Bul týraly QR Prezidenti Ákimshiligi basshysynyń birinshi orynbasary Darhan Káletaev aitty, dep habarlaidy QazAqparat.
«Prezident Qasym-Jomart Toqaevtyń biylǵy Joldaýy óziniń ereksheligimen kózge tústi. Eń basty ereksheligi – bul jańa Prezidenttiń alǵashqy Joldaýy boldy. Eń aldymen, Joldaýda halyq pen bilik arasyndaǵy dialog formýlasy boldy, «Halyq únine qulaq asatyn memleket» tujyrymdamasy ázirlendi. Qazir kóptegen sarapshylar osy baǵyt týraly, halyq tarapynan keri bailanys týraly pikirlerin bildirip júr. Qoǵamnyń túrli tarapynan oń pikirler túsip jatyr. Jalpy «Halyq únine qulaq asatyn memleket» tabysty júzege asyrylýda», - dedi D. Káletaev Prezidenttiń Qazaqstan halqyna Joldaýynyń alǵashqy nátijeleri týraly ǵylymi-praktikalyq konferentsiianyń ashylýynda.
Onyń aitýynsha, Joldaýdyń alǵashqy nátijeleri týraly sarapshylardyń baǵasyn alý mańyzdy.
«Sondyqtan da, bul konferentsiiany uiymdastyrýdy Eýraziialyq integratsiia jáne Qazaqstan strategiialyq zertteýler institýttaryna tapsyrdyq. Búgingi jiynda úlken qyzý pikirtalastyń bolǵanyn qalaimyz. Sebebi, pikirtalas mańyzdy. Alǵashqy qorytyndyda qaida bara jatqanymyzdy, durys baǵytta ekenimizdi, qoǵamnyń bizden ne kútip otyrǵanyn bilýimiz qajet. Qazirdiń ózinde Joldaý boiynsha naqty sharalar bastalyp ketti. Joldaýdy júzege asyrý týraly birqatar zańnamalyq aktiler qabyldandy. Jyl sońyna deiin Qasym-Jomart Kemelulynyń memlekettik apparat pen Úkimet aldyna qoiǵan naqty tapsyrmalarmen bailanysty taǵy birneshe memlekettik qujattardy bekitý josparlanǵan», - dedi D. Káletaev.
Aita keteiik, elordada Prezident Qasym-Jomart Toqaevtyń Qazaqstan halqyna Joldaýynyń alǵashqy nátijeleri talqylanyp jatyr. Oǵan memlekettik organdardyń, Qazaqstannyń ǵylymi-saraptamalyq qaýymdastyǵynyń 80-nen astam ókili qatysýda.
