Taldyqorǵan shaharynda jańa nysandar kóptep salynýda. Sonymen qatar, eskileri jańartylýda. Sapaly salynýy ákimdik tarapynan jiti qadaǵalanyp keledi. Oblys ákiminiń birinshi orynbasary Lazzat Turlashov kúrdeli jóndeý jumysy júrgizilip jatqan mádeniet basqarmasynyń ǵimaratyn aralady.
Merdiger kompaniia «Aýylqurylys» firmasy jóndeý jumysyn ýaqytynda aiaqtaitynyn aitty. Ishki jumystary aiaqtalýǵa jaqyn. Ákteý, syrlaý sharalary sońyna jetip qalypty. Synǵa alynǵan másele – mekemeniń qasynda avtoturaqtyń joqtyǵy. – Ǵimarat ishine qarjy basqarmasy da ornalasady. Iaǵni, kelýshiler qarasy kóbeiedi. Kóshege qoiylǵan kólikter saldarynan yńǵaisyzdyq týyndamas úshin avtoturaq ornatý kezek kúttirmes másele, – dedi Lazzat Mahatuly.
Osy oraida, Abai men Qabanbai batyr kósheleriniń qiylysyna avtoturaq ornyn belgileý, daiyndaý tapsyryldy. Budan keiin oblys ákiminiń orynbasary bastaǵan tekserýshi top ortalyq saiabaqqa bardy. Saiabaq qaita qalpyna keltirilýde. Munda kógaldandyrý sharasy da júrgizilýde. Jóndeý jumysyn iske asyrýshylarǵa kesteden qalmaý, qurylys materialdarynyń sapasyna mán berý eskertildi. Qaratal ózeniniń boiyndaǵy júzý basseini keńeitilýde.
Merdigerlerdiń aitýynsha, demalys orny shilde aiynda paidalanýǵa beriledi. Munda jaǵajai mańynda sýsyn ishetin orynnyń bolýy, sýǵa qaiyqtar jiberý jaiy tapsyryldy. Eń tereń jeri 2,5 metrdi quraityn basseinde saqtyq sharalary da qarastyrylýda. Qurylys nysandaryn aralaý ary qarai jańadan irge kótergen drama teatry, Saltanat saraiy, kórme keshenin kórýmen jalǵasty. Merdiger – «Ónerkásip Qurylys» jaýapkershiligi shekteýli seriktestigi. Mádeniet oryndarynyń ishki jumysy men syrtqy kelbetiniń kelisýi basty nazarda. Halyqqa qyzmet kórsetý oryndary kópshiliktiń kelýine, saltanatty sharalarda erkin demalýyna múmkindik týǵyzbaqshy. Ońtústik-batys turǵyn aýdanynda kottedjdi qalashyǵy, jabyq bassein jáne jeńil atletika maneji irge kóterýde. Zamanaýi sáýletpen salynyp jatqan qurylys nysandary ákimdik nazarynda. Materialdyń sapasy men sániniń kelistiligi úilesim tabady degen senim bar.
Gúljan TURSYN
