Qalaaralyq avtobýstar 5 maýsymnan bastap qatynaidy, - dep habarlaidy QR IIDM baspasóz qyzmeti.
2020 jyly 13 mamyrda Qazaqstan Respýblikasy aýmaǵynda koronavirýs infektsiiasynyń taralýyna jol bermeý jónindegi vedomstvoaralyq komissiianyń sheshimine sáikes, 5 maýsymynan bastap avtomobil kóligimen jolaýshylar tasymaly qalpyna keltiriledi.
Jolaýshylardy avtobýstarmen tasymaldaý kezinde tasymaldaýshylardyń tiisti jumys algoritmi Bas sanitarlyq dárigerdiń qaýlysynyń talaptaryn eskere otyryp ázirlendi.
Atap aitqanda, baǵdardyń sońǵy pýnktinde avtobýsqa dezinfektsiia júrgizý; jolaýshylardy salonǵa maskamen ǵana kirgizý; jolaýshylardyń 1 metr qashyqtyqty ustanýy; júrgizýshini qolǵap, maskamen qamtamasyz etý, ony árbir 2 saǵat saiyn aýystyrý; avtopark qyzmetkerin eki aptada 1 ret SOVID-19-ǵa teris nátije týraly anyqtama bolǵan kezde ǵana jumysqa shyǵarý siiaqty talaptar qoiylady.
Ákimdikter jolaýshy tasymaly kezinde koronavirýs infektsiianyń taralýynyń aldyn alýda tiimdi bolý úshin tasymaldaý protsesine qatysýshylardyń osy algoritmge sáikestigin qamtamasyz etýge qajetti sharalardy qabyldaýy tiis.
Qazirgi ýaqytta respýblikada 313 qalaaralyq baǵyt bar. Olardy 610 avtobýspen (syiymdylyǵy 45-55 oryndyq III sanattaǵy avtobýstar) 88 tasymaldaýshy kásiporyn atqarady.
Eske sala ketsek, 1 maýsymnan qalalar arasynda blokpostar alyp tastalady. Jeke avtokólikpen qalalar arasynda saparlaýǵa ruqsat etiledi.
Aita keteiik, 19 naýryzdan bastap Nur-Sultan men Almaty qalalarynda karantin jariialandy. Sol kezden bastap elordadan shyǵatyn qalaaralyq avtobýstardyń qozǵalysyna tyiym salyndy. Al, Shymkentten elorda men Almatyǵa qatynaityn avtobýstar 18 naýryzda toqtatyldy.
