Qalalar pandemiia oshaǵynda qaldy. Aýrý tirkelgen oqiǵalardyń shamamen 90 paiyzy – qalada. Bul kóbine halyqtyń tyǵyz ornalasýymen ǵana emes, qala ómirin uiymdastyrý, mundaǵy adamdardyń ómir salty, olardyń qaida jumys istep, qalai áreket etýine bailanysty bolyp otyr. Bul týraly BUU Bas hatshysy Antoniý Gýterrish aitty, dep habarlaidy BUU jańalyqtary saity.
«Negizgi aýyrlyq qalaǵa túsken. Olardyń kóbinde densaýlyq saqtaý júiesine kóp salmaq túsken, sýmen jabdyqtaý jáne sanitariia qyzmeti jóndi emes, ózge de prolemalary tolyp jatyr», - dedi Bas hatshy.
Búginde ǵalamshar turǵyndarynyń 55-ten astam paiyzy qalada ómir súrip jatyr. Qala turǵyndarynyń shamamen 24 paiyzy adamdar tyǵyz turatyn, qarapaiym sanitarlyq-gigienalyq jaǵdaiy joq aýdandarda tirshilik etýde. Kóptegen adamdar jumys orny, mektep, balabaqsha, tipti azyq-túlik dúkenderden alys jerde turyp jatyr. Búginde qala turǵyndarynyń kóbinde turǵylyqty jerinen 400 metrradiýsta qandai da bir qoǵamdyq ǵimarattary bolmai otyr. Osynyń barlyǵy pandemiiaǵa bailanysty aýyr daǵdarysqa ushyrady.
Ekonomikalyq shyǵynǵa tap bolǵan da osy – qala. Álemdik JIÓ-niń 80 paiyzy qalada. Álemdegi kóptegen kásiporyndar jumysyn toqtatty, meiramhanalar men ózge biznes jabyldy, milliondaǵan adam úide oqshaýlanyp qaldy.
«Qala álemin qaita oilastyryp, ózgertetin ýaqyt keldi. Qazirgi pandemiiadan qalyptasqan jaǵdaiǵa beiimdeletin sát kelip jetti», - dep málim etti BUU-nyń Bas hatshysy.
Ol úsh baǵytta áreket etýge keńes bergen: qaladaǵy teńsizdik kólemin qysqartý, jergilikti bilik pen qala turǵyndarynyń áleýetin nyǵaitý jáne barlyq turǵyndar úshin turaqty ári ádil damý jaǵdaiyn jasaý.
«Búginde bizdiń qalai turyp jatqanymyzdy, qalai ózara árekettesip, qalalarymyzdy qalai salyp jatqanymyzdy oilastyratyn múmkindik bar. «Ýrbanizatsiia álemindegi COVID-19» taldaý qujatynyń máni osynda», - dep atap ótti Bas hatshy.
