Jetisýdyń bas qalasy Taldyqorǵan jyl ótken saiyn qulpyryp, kelbeti aishyqtalyp keledi. Jasyl jelekke oranǵan shahardyń kóztartarlyqtai kóriktene túsýine áli de bolsa kúsh jumsalyp jatyr. Buǵan qazir oblys ákimi Amandyq Batalov erekshe kóńil bólip otyr. Sala mamandary da atsalysyp, qoldan kelgen kómekterin kórsetýde.
Osy rette Amandyq Ǵabbasuly salaǵa jaýapty qyzmetkerlermen taǵy bir márte bas qosyp, jiyn ótkizdi. Oǵan Qazaqstan Sáýletshiler odaǵynyń tóraǵasy, elimizdiń eńbek sińirgen sáýletshisi Aqmyrza Rústembekov bastaǵan sáýletshiler men jobalaýshylar qatysty. Jiynda qalanyń kórkemdik deńgeiin kóterip, kelbetin sulýlandyrýǵa bailanysty usynylǵan joba-josparlar qaralyp, jan-jaqty tanystyryldy. Onda belgili bolǵandai, ortalyq alańdaǵy sýburqaq sany kóbeiip, qala ajary aishyqtala túspek. Jobaǵa sáikes, qazirgi turǵan sýburqaqtar óz ornynda qalyp, tek olarǵa qaita jańartý jumystary júrgizilmek.
Óitkeni, taiqazan men Jetisýdyń jeti ózeni beinelengen bul oryndar turǵyndar úshin óte ystyq ári olar shahardyń simvolyna ainalǵan. Sol sebepti bastapqy qalpy saqtala otyryp, sý atqylaý men bezendirý sharýalaryna jańa tehnologiia qoldanylmaq. Olar arnaiy ornatylǵan qondyrǵynyń kómegimen kompiýter arqyly basqarylatyn bolady. Barlyq jańǵyrtý jumystary aiaqtalǵannan keiin aspanǵa atqylaǵan sý túrli túspen kómkerilip, áýezdi áýenmen árlenbek. Sóitip, aldaǵy ýaqytta jeti túrli sýburqaq oblys ortalyǵynyń ajaryn ashyp, burynǵydan da ásemdei túspek.
Iaǵni, bul jer qala qonaqtary men turǵyndardyń súiikti demalys ornyna ainalady dep josparlanyp otyr. Talqylaý barysynda jobanyń jai-japsaryna mán bergen oblys ákimi qurylys-jóndeý jumystary boiynsha naqty mindettemeler júktei otyryp, burynǵy sýburqaqtardyń sáýlettik kelbetin buzbai, qaita olarǵa ekinshi tynys berý kerektigin aitty. Mundai pikirge sáýletshiler de qosylyp, osy turǵyda oilarymen bólisti. Jiyn sońynda ortalyq alańnyń bolashaqtaǵy keskin-kelbetin tanystyrǵan beinetúsirilim kórsetildi.
Bir sózben aitqanda, aldaǵy ýaqytta qala ortasy aitarlyqtai ózgerip, aishyqtalatyn bolady. Sonymen birge oblys basshysy qalanyń kireberis tusyn áspettep, árleýge, zamanaýi úlgide boi kóterip jatqan jańa úilerdiń aýlasyn kógaldandyryp, abattandyrýǵa, ǵimarattardyń aýlasyn kórkeitip, túrli tústi gúldermen kómkerýge de bailanysty tapsyrmalar berdi.
Aigúl Baibosynova
