Foto: Adam Delimhanovtyń Telegram-arnasy
Sheshenstan basshysy Ramzan Qadyrovtyń 15 jastaǵy uly Adamǵa "Sheshenstan batyry" ataǵy berildi. Bul jóninde Resei memlekettik dýmasynyń depýtaty Adam Delimhanov habarlady.
Delimhanov kishi Qadyrovty "erekshe saýatty, jan-jaqty, bilimdi, maqsatqa umtylǵysh jas jigit" dep sipattady.
Ol sonymen birge Adam Qadyrovtyń barlyq jetistikterin de tizip shyqty: "Qurandy jatqa biledi", "aralas kúres boiynsha bedeldi jarystarda birqatar jeńisterge qol jetkizgen" dedi.
Ramzan Qadyrovtyń ózi ulyna "Sheshenstan batyry" ataǵy berilýine túsinikteme bermedi.
Adam Qadyrov jýyrda Groznyi túrmesinde Qurandy órtedi dep aiyptalǵan Nikita Jýraveldi uryp-soqqan. Bul oqiǵa jóninde Reseidiń adam quqyqtary jónindegi ýákili Tatiana Moskalkova aitqan. Ombýdsmen Sheshenstannyń adam quqyqtary jónindegi ýákili Mansýr Soltaevqa qaiyrylyp, oqiǵanyń jai-japsaryn súraǵan. Ol "soqqyny meditsinalyq kýálandyrý men kýágerlerdiń sózine nazar aýdarǵa shaqyrǵan".
Al Soltaev Jýraveldiń oqiǵasymen "organdar ainalysyp jatyr, árbir fakt tekseriledi" dedi. Onyń aitýynsha, Jýravel ózin aiaǵy men qoldarynan urǵanyn aitqan.
Keiin Sheshenstan ulttyq saiasat, syrtqy bailanys, aqparat jáne baspasóz ministri Ahmed Dýdaev 15 jastaǵy Adam Qadyrovtyń stýdent Nikita Jýraveldi "dini sezimge berilgen kúii" uryp-soqqanyn moiyndaǵan.
Sheshenstan basshysy Ramzan Qadyrov uly Adamnyń stýdent Nikita Jýravlevti urǵanyn moiyndap, áreketin maquldaǵan. Ol sonymen birge Jýravel Qurandy órtegeni úshin "qatań jazalanýy kerek" dep málimdegen. Odan bólek, Qadyrov ulynyń Jýraveldi uryp jatqany jóninde video jariialap maqtanǵan.
Aita keteiik, Volgogradta quran órtelgeni týraly video áleýmettik jelide biyl 19 mamyrda shyqqan. Eki kúnnen soń jergilikti turǵyn, Ýkrainada týǵan, Volgogradta tamaq tasýshy bolyp isteitin Nikita Jýraveldi ustaǵan. Ol anneksiialanǵan Qyrymnan Volgogradqa barǵan.
Resei tergeý komitetiniń basshysy Aleksandr Bastrykin Jýraveldiń isin Sheshenstanǵa bergizgen.
Byltyr qazanda Ramzan Qadyrov kámeletke tolmaǵan úsh uly - Ahmat, Áli jáne Adamnyń Ýkrainadaǵy urys qimyldaryna qatysqanyn málimdegen. Onysyna dálel retinde balalarynyń zeńbirek pen granatometpen atyp turǵanyn kórsetetin video jariialaǵan. Sheshenstannyń oppozitsiialyq telearnalary detaldaryna qarap, videonyń tylda túsirilgenine nazar aýdarǵan.
