Biyl maýsymnyń 11-nen 12-ne qaraǵan tún - Qadir túni.
Ailardyń sultany - Ramazan aiy bolsa, túnderdiń eń qasietti túni - Qadir túni. Óitkeni, bul tún barsha adamzatqa arnalǵan Quran Kárimniń aiattary túse bastaǵan tún.
Qadir túni, ol - túnderdiń eń qaiyrlysy. Óitkeni, hadiste ailardyń qaiyrlysy Ramazan, túnderdiń qaiyrlysy Qadir túni, kúnderdiń qaiyrlysy Juma kúni ekeni aitylǵan. Bul túndi negizinen Ramazan aiynyń sońǵy on kúninde, taq sanda izdeý kerek. Kópshilik ǵalymdardyń ortaq pikirinshe, Qadir túni Ramazan aiynyń jiyrma jetinshi túni bolyp esepteledi.
Quranda bul túnniń artyqshylyǵyn túsindiretin arnaiy súre de bar. Ol súrede Jaratýshy iemiz bylai deidi:
«Anyǵynda Biz Qurandy Qadir túni túsirdik. Qadir túniniń ne ekenin bilesiń be? Qadir túni myń aidan da qaiyrly. Ol túni perishteler men Rýh Rabbylarynyń ámirimen jerge túsedi. Ol tań aǵaryp atqansha jalǵasady» («Qadir» súresi).
Múminder bul túndi daiyndyqsyz ótkizbeýi tiis. Óitkeni, Ábý Huraira (r.a.) sahabamyz jetkizgen hadiste «Kimde kim Qadir túniniń artyqshylyǵyna senip, saýabyn Alladan kútip, ǵibadat, qulshylyqpen ótkizse, ótken-ketken kúnálary keshiriledi» delingen (Buhari, Qadir, 1).
Bul tún myń aidan qaiyrly bolýymen de artyqshylyqqa ie. Myń ai týra seksen úsh jyl, tórt aiǵa teń. Al bul óz kezeginde burynǵy úmbetterdiń ómir boiy jinaǵan saýabyn bir túnde alý múmkindigi degen sóz.
Qadir túni túnimen qulshylyq jasai almaityndarǵa eń bolmasa taraýih namazynan keiin birshama ýaqytyn duǵaǵa arnaýy kerektigi aitylady. Óitkeni, bul túni jasalatyn duǵalardyń qabyl bolatynyna degen nyq senim bar.
Uqsas jazbalar:
"Myń aidan da qaiyrly Qadir túni"
Qadir túni jasalatyn 7 amal qandai?
