Aýǵanstannyń ulttyq qaýipsizdigi jónindegi keńesshiniń habarlaýynsha, Tájikstan aýmaǵyn panalaǵan 2300 aýǵan sarbazy elge oraldy.
Tájikstan biligi ázirge osy málimetke qatysty aqparat bermedi. Biraq 6 shildede jergilikti aqparat quraldary aýǵan sarbazdarynyń bir bóligin Kabýlǵa jóneltý úshin Kýliab áýejaiyna jetkizgenin habarlaǵan.
Aýǵan jaýyngerleriniń elge oralǵanyn Aýǵanstannyń ulttyq qaýipsizdigi jónindegi keńesshisi Hamdýlla Mýhib seisenbi kúni jýrnalisterge habarlaǵan. Onyń aitýynsha, elge oralǵan sarbazdar Badahshan provintsiiasynyń astanasy Faizabadty qorǵaýǵa jóneltilgen.
"2300 jaýynger Aýǵanstannyń qorǵanys jáne qaýipsizdik kúshterine qosyldy. Tájikstandy panalaýǵa májbúr bolǵandar endi Faizabad halqyn qorǵap júr" dedi ol.
Mýhib aýǵan sarbazdarynyń elge qalai jetkizilgeni týraly eshteńe aitpady.
Ozodi radiosy derekkóziniń habarlaýynsha, Tájikstandaǵy aýǵan sarbazdaryn elge qaitarý máselesin 4 shildede Tájikstan prezidenti Emomali Rahmon men Aýǵanstan prezidenti Ashraf Gani talqylaǵan.
Bunyń aldynda tájik biligi júzdegen aýǵan sarbazy tájik-aýǵan shekarasy arqyly Tájikstanǵa ótkenin habarlaǵan. Tájikstan men Aýǵanstan shekarasyndaǵy Sherhan Bandar baqylaý-ótkizý beketin "Taliban" qozǵalysynyń sodyrlary basyp alǵan soń, úkimet sarbazdary Tájikstan aýmaǵyna qarai qashqan. Sol kezde, 22 maýsymda 134 aýǵan sarbazy kórshi elge ótken.
Odan soń júzdegen aýǵan jaýyngeri Ámýdariia arqyly Tájikstan aýmaǵyna ótti. Tájik biligi el aýmaǵyna barlyǵy 1700 aýǵan sarbazy ótti dep habarlady. Endi aýǵan sheneýnigi 2300 aýǵan jaýyngeriniń elge oralǵanyn aityp otyr.
Tálipter Aýǵanstannyń soltústiginde Tájikstanmen shekaralas jatqan ondaǵan okrýgty basyp alǵanyn habarlady.
Aýǵanstandaǵy jaǵdai Tájikstandy alańdatyp otyr. Tájikstan prezidenti Emomali Rahmon 5 shildede Aýǵanstandaǵy jaǵdaidy Resei, Qazaqstan jáne Ózbekstan jetekshilerimen birge talqylady. Sol kúni Emomali Rahmon shekaraǵa 20 myń jaýynger ornalastyrýdy tapsyrdy.
