Keiingi málimetterge qaraǵanda, Kabýl qalasynyń halyqaralyq áýejaiynda beisenbi kúni bolǵan eki jarylystan 60-qa jýyq adam ólip, kemi 140 adam jaralanǵan. Jarylysty radikaldy "Islam memleketi" uiymy (Joǵarǵy sot sheshimi boiynsha Qazaqstanda tyiym salynǵan) moinyna alǵan, dep jazady Azattyq.
AQSh Qorǵanys ministrliginiń eki qyzmetkerine siltegen CNN habaryna qaraǵanda, alǵashqy jarylys Kabýl áýejaiyna kire beriste, ekinshisi áýejaiǵa jaqyn mańdaǵy Barron qonaqúiinde bolǵan.
Áýejai aldyndaǵy jaralystan ólgender men jaralanǵandar kóp. Arasynda AQSh-tyń áskeri qyzmetkerleri de bar. Bastapqyda "teńiz jaiaý áskeriniń tórt sarbazy óldi" degen edi. Keiinnen Pentagon 12 sarbazdyń ólgenin habarlady. Kemi 15 áskeri qyzmetker jaralanǵan. Bul - keiingi jyldary AQSh áskerinde bir sátte bolǵan úlken shyǵyn.
Áýejai aldynda jankeshti adam ózin jaryp jibergen. Terrordan ólgenderdiń naqty sany belgisiz. Ólgenderdiń kópshiligi evakýatsiialyq reistermen Aýǵanstannan ketý úshin áýejaiǵa kelgen aýǵandar.
Terrorǵa bailanysty AQSh prezidenti Djo Baiden Aq úide málimdeme jasady. Ol qaitys bolǵan Amerika sarbazdaryn "ózge adamdardy qutqarý jolynda jan qiǵan batyrlar" dep atady. Kabýl áýejaiynda AQSh áskeri Aýǵanstannan ketip jatqan myńdaǵan adamnyń qaýipsizdigin baqylap tur. Baidenniń sózinshe, keiingi 11 kúnde 100 myńnan astam adam evakýatsiialanǵan.
Baiden AQSh terakt jasaǵandardy taýyp, jazaǵa tartady dep málimdep, terrordy "Islam memleketi" uiymyn jasaǵan bolýy múmkin dedi. Baidenniń sózinshe, Kabýldan evakýatsiia jalǵasa beredi, 31 tamyzǵa deiin AQSh áskerin alyp ketý týraly jospar ózgermegen.
Amerika biliginiń Aýǵanstannan áskerdi áketý týraly sheshimin synaǵandarǵa 16 tamyzda Djo Baiden "Aýǵanstanda AQSh azamattary men áskerine qastandyq jasalsa jyldam jáne oisyrata soqqy beretinin" aitqan edi. AQSh Ókilder palatasyndaǵy jalǵyz áskeri sviashennik, kongressmen Dag Kollinz osy sózdi ustap, Baidendi áreketke shaqyryp otyr.
"Prezident Baiden bir apta buryn "Talibanǵa» qarýly kúshterimiz ben áýejaidaǵy jumysymyzǵa jasalǵan kez kelgen shabýylǵa tez arada jaýap qatatynymyzdy túsinikti jetkizdik" degen edi", - dep jazdy Kollinz "Tvitter" paraqshasyna.
Kabýldan alyp ketetin evakýatsiia reisterine iligý úshin áýejaiynyń aldynda myńdaǵan aýǵan shoǵyrlandy.
"Olar bostandyq pen qaýipsiz ómirdi qalady. Tótenshe jaǵdai kezinde óte jiirkenishti shabýyl jasaldy", – dedi áýejaidaǵy terror týraly Germaniia kantsleri Angela Merkel.
Norvegiia Syrtqy ister ministri Ine Mari Eriksen Sioreide áýejaiǵa kirý múmkin bolmaǵandyqtan, evakýatsiiany toqtata turatynyn málimdedi.
Tamyzda Kabýldy soǵyssyz alǵan soń "Taliban" qozǵalysy Aýǵanstanǵa tolyq baqylaý ornatqanyn jariialady. Evakýatsiia bastalǵaly AQSh pen odaqtastary Kabýldan 90 myńnan astam adamdy alyp ketken. Onyń ishinde tálipterdiń qýǵyn- súrgininen seskengen ondaǵan myń aýǵan bar.
