Jusan Bank basqarma tóraǵasy Nurdáýlet Aidosov Qazaqstan Úkimetiniń Kcell uialy bailanys operatorynyń aktsiialaryn qaitarý týraly "ótinishine" qatysty aqparatqa pikir bildirdi, - dep habarlaidy Tengrinews.kz.
Jusan Bank basshysy Kcell "Samuryq-Qazyna" ulttyq ál-aýqat qorynyń portfeldik kompaniialarynyń tartymdy jáne tabysty kógildir fishkalarynyń biri retinde "árine, birqatar investordyń qyzyǵýshylyǵyn týdyratynyn" atap ótti.
"Birneshe usynys aldyq, onyń ishinde "Samuryq-Qazyna" UÁQ-nyń ózinen usynys kelip tústi. Bizge olardyń korporativtik basqarýy, ishki saiasaty, damý strategiiasy men reformalary unaǵandyqtan, olarda artyqshylyq bar.
Ózderińiz biletindei, Kcell bizdiń eń iri blank qaryz alýshymyz sanalady jáne onymen naryqta suranysqa ie birneshe tabysty iri jobalar iske asyryldy. Qazirgi ýaqytta túpkilikti sheshim áli qabyldanǵan joq dep aita alamyn, kelissózder satysynda turmyz. Satyp alý jáne mámile formaty týraly másele, árine, kommertsiialyq qupiia sanalady, biraq aktsiialar birjada saýdalanady jáne mundai aqparat áser etýi múmkin birqatar minoritarii bar. Bir ǵana nárseni aita alamyn: kelisim eki tarap úshin de ózara tiimdi bolady", - dedi Nurdáýlet Aidosov.
Basqarma tóraǵasy bank biznestegi telekom-baǵytty damytýdy jáne qoldaýdy jalǵastyratynyn, óitkeni ol óziniń tabystylyǵy men joǵary suranysyn kórsetkenin atap ótti.
"Bul mámileniń nátijesi qandai bolatynyna qaramastan, ol telekommýnikatsiialyq ónimimizdi damytý jónindegi josparlarymyzǵa áser etpeidi", - dep túiindedi ol.
Buǵan deiin Bloomberg agenttigi óz derekkózderine silteme jasap, Qazaqstan Úkimeti Jusan Bank-ten eldegi eń iri uialy bailanys operatorynyń aktsiialaryn bir jyl buryn satyp alǵan baǵamen qaitarýdy suraǵanyn habarlaǵan bolatyn.
