Foto: Anadoly
Izrail premer-ministri Biniamin Netaniahý kúnine 10 izraildik tutqyn bosatylatyn bolsa, Gaza sektoryndaǵy tórtkúndik gýmanitarlyq úzilisti uzartý múmkindigin quptaitynyn málimdedi, dep habarlaidy Kazinform Anadoly aqparat agenttigine silteme jasap.
Biniamin Netaniahý AQSh prezidenti Djo Baidenmen telefon arqyly sóileskennen keiin videoúndeý jasap, osylai dep aitty.
Premer-ministrdiń málimdeýinshe, ol AQSh prezidentine Gazadaǵy áskeri qimyldarǵa «bar kúshimen» qaita oralýǵa nietti ekenin habardar etken.
Onyń sózinshe, Izrail «HAMAS-ty joiýdy», tutqynǵa alynǵandardyń bárin qaitarýdy jáne Gazanyń «burynǵy kúige oralmaýyn» qamtamasyz etýdi maqsat etip otyr.
Bul rette HAMAS ókilderi de kóbirek tutqyn bosatý úshin Izrailmen gýmanitarlyq úzilisti uzartýǵa nietti ekenin málimdedi.
Izrail men HAMAS arasyndaǵy qaqtyǵysqa tórtkúndik gýmanitarlyq úzilis týraly bitim juma, 24 qarashada jergilikti ýaqyt boiynsha tańǵy saǵat 07:00-de kúshine engen bolatyn.
Bitim Izrail túrmelerindegi 150 palestinalyq tutqyndy HAMAS ustaǵan 50 izraildikke aiyrbastaýdy qarastyrady.
Eki jaqtan da bostandyqqa shyǵatyndar arasynda áielder men balalar bar. Qazirgi ýaqytta kelisim aiasynda Gaza sektorynda ustalǵan izraildik 39 áiel men bala, sondai-aq Izrail túrmelerindegi 117 palestinalyq áiel men bala bosatyldy.
Eske salaiyq, Palestinalyq HAMAS radikaldy toby 7 qazanda Izrailge shabýyl jasap, mýzykalyq festival ótip jatqan jerden kóptegen adamdy kúshtep áketken bolatyn. Tutqynǵa alynǵandar arasynda Qytai men Tailand azamattary da bar ekeni aityldy.
22 qarashada Izrail men HAMAS tutqyndardy bosatýǵa, soǵysty ýaqytsha toqtatýǵa keliskenin jazdyq.
Tutqyndardyń alǵashqy legi 24 qarashada bosatyla bastady. Olar Tailandtyń 12 azamaty ekeni aityldy.
Keiinnen HAMAS taǵy 13 izraildikti erkine qoia berdi. Oǵan jaýap retinde Izrail 39 palestinalyq tutqyndy jiberdi. Sonymen qatar Tailandtyń taǵy tórt azamaty bosatyldy.
Búgin HAMAS toby Qyzyl Krestke izraildik tutqyndardyń úshinshi tobyn tapsyrǵany málim etildi.
