Jeksenbi kúni túnde jáne tańerteń HAMAS jaýyngerleri Izrailge zymyran shabýylyn jalǵastyrdy, al Izrail áskerileri Gaza sektoryna jańa soqqylar jasady. 2014 jyldan bergi eń úlken qaqtyǵys jetinshi kúnge sozyldy jáne deeslakatsiia belgileri kóriner emes, dep habarlaidy BBC.
Izrail áskerileriniń habarlaýynsha, soqqylardyń biri HAMAS tobynyń saiasi kóshbasshysy Iahia Sinvardyń úiine tigen. Bul ýaqytta úide bireýdiń bolǵan-bolmaǵany áli belgisiz.
Tańerteń Izrail qorǵanys armiiasy úidegi jarylystyń sýretterin jariialady.
Taǵy bir áýe soqqysy HAMAS qozǵalysynyń «Djabaliia» batalony komandiriniń úiine túsken.
Izrail áskerileri eki úide de toptyń terroristik infraqurylymy bolǵanyn habarlady.
HAMAS ókilderiniń málimdeýinshe, jeksenbi kúni tańerteń Gazada 26 adam qaza tapqan. Osylaisha, qaitys bolǵandardyń jalpy sany 174-ke jetti, onyń ishinde 47 bala bar.
Izrailde on adam mert bolǵan, onyń ishinde eki bala bar.
HAMAS jaýyngerleri Izrail aýmaǵyn zymyranmen atýdy jalǵastyrdy, saldarynan kóptegen turǵyndar bombadan qashýǵa májbúr boldy. Izrail áskerileriniń málimetinshe, bir túnde palestinalyqtar Izrailge qarai 120-ǵa jýyq zymyran atqan.
Jalpy alǵanda, eskalatsiia basynan beri Izrail armiiasynyń málimetinshe, Palestina toptary Izrail aýmaǵynda 2900-ge jýyq zymyrandy atqan, onyń 1150-in «Temir kúmbez» júiesi ustap aldy. Al 450 zymyran Gazanyń ózine qulaǵan, dep habarlaidy Izrail qorǵanys armiiasy.
Jeksenbi kúni keshke osy qaqtyǵysqa arnalǵan BUU Qaýipsizdik Keńesiniń otyrysy belgilendi.
Bir kún buryn AQSh prezidenti Djo Baiden Izrail premer-ministri Biniamin Netaniahýmen jáne Batys jaǵalaýdaǵy Palestina ákimshiliginiń basshysy Mahmýd Abbaspen telefon arqyly sóilesip, jaǵdaiǵa alańdaýshylyq bildirdi.
Seisenbi kúni eýrodiplomatiia basshysy Jozep Borrel HAMAS pen Izrail arasyndaǵy qaqtyǵystyń ýshyǵýyn Eýroodaqtyń Syrtqy ister basshylarymen talqylaidy.
