Túrkistan oblysynda iz-túzsiz joǵalǵan azamatty qaryzyn qaitarǵysy kelmegen tanysyn óltirgeni anyqtaldy. Bul týraly óńirlik Politsiia departamenti habarlady.
14 naýryz kúni túngi saǵat 23:00 shamasynda Túrkistan oblysy Sairam aýdandyq politsiia basqarmasyna jergilikti áiel turǵyn kúieýiniń iz-túzsiz joǵalǵany týraly habarlaǵan. Sairamdyq saqshylar joǵalǵan azamatty izdeýge birden kirisken. Jan-jaqqa baǵyttamalar berilip, aýdandyq politsiia basqarmasynyń jeke quramy jumyldyryldy. Aýdandaǵy taksi júrgizýshilerinen jáne kórýi múmkin degen turǵyndardan suraq-jaýap alyndy.
Atqarylǵan aýqymdy jumystyń nátijesinde aýdan politseileri kúdiktiniń izine túsken. Ol joǵalǵan azamattyń tanysy, Sairam aýdany, Qaramurt aýylynyń turǵyny. Kúdikti óz kinásin moiyndamai, jaýaptan jaltarýǵa tyrysqan.
«Alaida politseiler dálelder men aiǵaqty zattardy jinaqtap, joǵalǵan azamat óziniń «BMV» kóligin tastap, tek osy kúdiktimen jolyqqanyn jáne kúdiktiniń kóligine otyryp ketkenin tolyǵymen dáleldedi. Osydan soń kúdikti óz kinásin tolyq moiyndady», - dedi politsiiadan.
Tekserý barysynda belgili bolǵandai, joǵalǵan azamat óz tanysynan iri kólemdegi aqshasyn alý úshin jolyqqan. Kúdiktiniń kóligine otyryp, jolda ketip bara jatqanda ekeýiniń arasynda daý-janjal týyndaǵan. Saldarynan qaryzdy qaitarǵysy kelmegen kúdikti er azamatty býyndyryp óltirgen. Qylmys izin jasyrý maqsatynda denesin karerdiń mańyna kómip tastaǵan.
«Kúdikti er azamat qamaýda. Ol buryn sotty bolmaǵan. Oǵan qatysty QR QK-niń 99-baby 1-bóligimen («Adam óltirý») sotqa deiingi tergep-tekserý jumystary júrgizilýde. Istiń tolyq mán-jaiy tergeý barysynda anyqtalatyn bolady», - dep tolyqtyrdy politsiiadan.
