Qazaqstan musylmandary dini basqarmasynyń 30 jyldyǵyna orai Aqtaý qalasynda uiymdastyrylǵan «Ádemi áýezdi azanshy» respýblikalyq IV azanshylar jarysy qorytyndylandy, dep habarlaidy "Ult aqparat".
Osymen tórtinshi ret ótken jarysta qazylar alqasynyń sheshimimen bas júldeni Nur-Sultan qalasyndaǵy respýblikalyq «Áziret Sultan» meshitiniń azanshysy Erlan Bitenov jeńip alsa, ekinshi oryn Mańǵystaý oblysy, Jańaózen qalasynyń naib imamy Ábdilmútálip Joraqululyna buiyrdy. Al úshinshi oryndy Almaty qalasyndaǵy «Nur Múbarak» meshitiniń azanshysy Aqnazar Maratuly qanjyǵasyna bailady. Jambyl oblysynan kelgen Jalǵasbai Jubatqanov, qaraǵandylyq Saǵyndyq Ahmediianov pen qyzylordalyq Bekzat Júsipuly yntalandyrý syilyǵyna ie bolsa, jeńimpazdardy QMDB tóraǵasy, Bas múfti Naýryzbai qajy Taǵanuly marapattap, aq tilegin aitty.
– Qazaqta «Qudaiǵa jaǵam deseń, azandy bol, halyqqa jaǵam deseń, qazandy bol» degen sóz bar. Azan – shariǵatta úkimi bekitilgen súnnet. Azannyń durys bolýy, maqamnyń ádemiligi óte mańyzdy. Azanshylar jarysynyń maqsaty da olardyń kásibiligin arttyrý, ádemi aitý ǵana emes, azannyń sharttaryn da bilý kerek. Álemdi jailaǵan pandemiia kezinde meshit esikteri jabylǵanymen, azan aitý toqtaǵan joq. Meshitterde bes mezgil azan úni sharyqtap turdy. Azan aitylǵan jerdi Alla Taǵala túrli jamandyqtan saqtaidy. Laiym, ádemi áýezdi azanshylar kóp bolyp, halqymyzdyń imandylyǵy artyp, jerimizde tynyshtyq bolǵai, - dedi Bas múfti.
Sondai-aq QMDB tóraǵasy Naýryzbai qajy Taǵanuly azanshylar jarysyn jyl saiyn dástúrli túrde ótkizý josparda bar ekenin aitty. Jarys sońynda jeńimpazdar men júldegerler aqshalai syilyqpen, sondai-aq, jarysqa qatysýshylar men demeýshiler arnaiy alǵys hatpen marapattaldy.
