Politsiia qyzmetinde kinolog mamandardyń qyzmeti erekshe. Qylmysty ashý barysynda itterdiń de kómegi kóp tiedi. Nátijesinde tártip saqshylary san alýan tosyn jaǵdaidyń aldyn alyp, qoǵamdyq qaýipsizdikti saqtaý baǵytynda oń nátijege qol jetkizedi.
Osy oraida itterdi sol jumysqa beiimdep, mańyzdy mindetti zor jaýapkershilikpen oryndai biletin kinolog mamandar qyzmeti jaiynda ne bilemiz?
QazAqparat tilshisi Qyzylorda qalasyndaǵy ZK-169/1 mekemesiniń baqylaýshy-kinolog mamany Shýaq Balǵabekulynyń atqaratyn qyzmetin barysyn baǵamdai otyryp, olardyń qyzmetine bir sát zer saldy.
Kóp adam kinologiia ǵylymyn, kinolog mamandyǵyn kinomen, kinomatografiiamen shatastyrýy múmkin. Sebebi, ataýy uqsas, sondai áser qaldyratyny anyq. Shyn máninde, ol buryn paida bolǵan, bul mamandyq ieleri itterdi qolǵa úiretýmen ainalysady.
Qyzylorda qalasyndaǵy ZK-169/1 mekemesiniń baqylaýshy-kinolog mamany Shýaq Balǵabekuly bul qyzmetke kelgenine 10 jylǵa jýyq ýaqyt boldy. Sodan beri kinolog bolyp jumys isteidi. Ózi bala kúninen itti jaqsy kóretin, áskerde júrgende kinologiia bólimine qabyldandy. Sodan beri itterdi úiretip, olardy túrli jumystarǵa baýlyp keledi.
Iisshil itterdi qalai úiretedi? Bul jóninde Shýaq óz oiymen bylaisha bólisti.
«Ol úshin itpen myqty bailanys ornatý kerek. Sol kezde ǵana ol da saǵan senetin bolady. Kez-kelgen qiyndyqta seni eshqashan tastamaidy. Aldymen onyń minezin naqtylap, neni jaqsy kóredi, neni unatpaidy degen saýaldarǵa jaýap tabýyń tiis. Sonyń bárin naqty bilýiń qajet. Jalpy, úiretý barysynda itti urýǵa bolmaidy. Ol da kez-kelgen qiyn sátte óz iesinen kómek kútedi. Ol sóilei almaǵanmen, tilin túsingen adamǵa ony is-qimylmen bildiredi. Qazaq halqy ony jeti qazynanyń biri sanaidy. Itti ózińe baǵyndyrý, aitqanyńdy buljytpai oryndatý ońai emes. Olardyń minezi adam balasy sekildi holerik, sangvinik, flegmatik jáne melanholik bolyp tórtke bólinedi. Dál sol sekildi minezine qarap, qai ittiń qai salada jumys isteýge beiim ekenin anyqtaýǵa bolady. Óz basym ásker qatarynda qyzmet etken jyldary olardy úiretýdiń barlyq qyr-syryn, ailasyn úirendim. Tájiribeli mamandardan bilim aldym. Sol sebepti men úshin qazir kinologiia ómirimniń bir bólshegine ainaldy», - dedi Shýaq Baltabaiuly.
Qyzylorda oblystyq qylmystyq atqarý júiesi departamentiniń baspasóz mamany Dana Dostanovanyń aitýynsha, departamentte kinologiia qyzmeti 2013 jyly ashylǵan. Búgingi tańda munda qyzmettik 4 belgiialyq ovcharka bar. Olar esirtki zatyn izdep, adamdy aiaq iziniń iisimen tabady. Túzeý mekemesinen sottalǵandar qashqan jaǵdaida nemese esirtki tasymaldansa, qyzmettik itter qylmystyń aldyn alýǵa atsalysady.
«Maǵan Oskar atty kyzmettik it bekitilgen. Ol adamdy iziniń iisimen izdep tabady. Oskar Almaty qalasyndaǵy Kinologiia ortalyǵynda alǵashqy daiarlyqta jaqsy nátije kórsetti. Budan bólek, Osko jáne Liýtyi atty esirtki izdeýshi kyzmettik itter sol ortalyqtan 2018 jyly alǵashqy daiarlyq, byltyr qaita daiarlyqtan ótti. Jaqsy kinolog basqa mamandyq ieleri sekildi árdaiym izdeniste júrip, kásibiligin, sheberligin arttyrýy tiis. Sonyń bir joly - halyqaralyq it kórmelerine qatysý. Ol kinologtardyń kásibi deńgeide bir-birimen tájiribe, bilim almasýyna jol ashady. Búginde óz basym elimizdiń barlyq óńirindegi osy salada qyzmet etetin mamandarmen bailanysyp, bilmegenimdi úirenip, bilgenimdi úiretip júrmin», - dedi ol.
Kinolog bolý - itpen birge júrý ǵana emes, ittiń anatomiiasyn, fiziologiiasyn, psihologiiasyn tereń zerdeleý, onyń aýrýlaryna em izdeý, durys tamaqtandyrý. Bul mamandyqtyń kópshilik bile bermeitin qyr-syry kóp. Olarǵa kúnine eki ret, tańerteń jáne keshke quramy dárýmenge bai, arnaýly jem-sý beriledi. Immitatordy paidalana otyryp esirtki iisin umytyp kalmas úshin kúndelikti 2 márte oqý jattyǵý júrgiziledi. Eń bastysy, mamandar úshin shydamdylyqpen maqsattylyq, tabandylyq pen baqylaǵyshtyq qasiet qajet.
Aǵa serjant Shýaq Balǵabekulynyń kúndelikti qyzmet barysynda ZK-169/5 mekemesiniń syrt aimaǵyn baqylaidy. Sondai sátterde mekeme aýmaǵyna tyiym salynǵan zattardy syrttan laqtyrýǵa kelgen azamattardy der kezinde anyqtap, tiisti organdarǵa tapsyrǵan.
«Qyzmettik ittiń kómegimen jyl basynan birneshe keleńsiz jaǵdaidyń joly kesildi. Máselen, mekemege tyiym salynǵan uialy telefon laqtyrmaq bolǵan bir azamat ustaldy. Oǵan QR Ákimshilik quqyqbuzýshylyq týraly kodeks boiynsha eskertý jariialandy. Al mamyr aiynda bir azamatsha jazasyn óteýshi jaqynyna esirtki ótkizbekshi boldy. Ol qyzmettik itterdiń kómegimen qolǵa tústi. Qazir oǵan bailanysty QR Qylmystyq kodeksiniń 297 babynyń 1 bóligimen is júrgizilýde». - dedi Shýaq Balǵabekuly.
