Álemniń 2-raketkasy, ispaniialyq Rafael Nadal Rolan Garros týrniriniń jeńimpazy atandy, dep habarlaidy "Ult aqparat".
R.Nadal finalda álemniń 1-raketkasy, serbiialyq Novak Djokovichpen bas júldeni sarapqa saldy.
Ispaniialyq tennisshi buǵan deiin «Úlken dýlyǵa» týrnirin 19, sonyń ishinde «Rolan Garros» jarysyn 12 márte utqan bolatyn. Sarapshylardyń ony topyraq tósenishinde ótetin dodalardyń koroli, tennis tarihyndaǵy úzdik oiynshy dep sanaýy tegin emes.
N.Djokovich «Úlken dýlyǵa» jarystarynda 17 ret top jardy. Degenmen ol Frantsiia ashyq chempionatynda bir-aq ret jeńimpaz atandy.
Osyǵan deiin qarsylastar 55 márte ózara kezdesse, sonyń 29-ynda 33 jastaǵy Novak jeńiske jetti. Odan bir jasqa úlken Nadal 26 jeńisiniń kópshiligin topyraq tósenishinde qol jetkizdi. Jalpy, bul básekeni alyptar shaiqasy deýge bolady.
Birinshi partiiada ispaniialyq tennisshi serbiialyqtyń birde-bir geim alýyna múmkindik bergen joq – 6:0. Mundai esep myqtylar arasynda óte sirek kezdesedi.
Ekinshi sette de R.Nadal aiqyn basymdylyq tanytty – 6:2.
Úshinshi partiiada esep 2:2 bolǵan mezette Nadal breik jasaǵanymen, Djokovich sol boida qarymta qaiyrdy – 3:3. Bul Novaktyń matchtaǵy alǵashqy breigi edi. Esep 5:5 bolǵanda, Nadal qarsylasy qatelesip, jetinshi breigine qol jetkizdi – 6:5. Sodan keiin matchty eispen túiindedi – 7:5.
Finaldyq jekpe-jek 2 saǵat 42 minýtqa sozyldy.
Osylaisha R.Nadal Rolan Garros týrniriniń 13 dúrkin chempiony atanyp, «Úlken dýlyǵa» jarystaryndaǵy jeńisi (20) jóninen shveitsariialyq Rodjer Federermen teńesti.
Qazaqstandyqtar Aleksandr Býblik pen Mihail Kýkýshkin Frantsiia ashyq chempionatynda ekinshi ainalymnan asa almady. Endi olar 12 qazan kúni bastalatyn Sankt-Peterbýrg ATR 500 týrnirinde baq synaidy. A.Býblik bastapqy kezdesýin amerikalyq Makkenzi Makdonaldpen, M.Kýkýshkin serbiialyq Miomir Ketsmanovichpen ótkizedi.
