ەلەمنٸڭ 2-راكەتكاسى, يسپانييالىق رافاەل نادال رولان گارروس تۋرنيرٸنٸڭ جەڭٸمپازى اتاندى, دەپ حابارلايدى "ۇلت اقپارات".
ر.نادال فينالدا ەلەمنٸڭ 1-راكەتكاسى, سەربييالىق نوۆاك دجوكوۆيچپەن باس جٷلدەنٸ ساراپقا سالدى.
يسپانييالىق تەننيسشٸ بۇعان دەيٸن «ٷلكەن دۋلىعا» تۋرنيرٸن 19, سونىڭ ٸشٸندە «رولان گارروس» جارىسىن 12 مەرتە ۇتقان بولاتىن. ساراپشىلاردىڭ ونى توپىراق تٶسەنٸشٸندە ٶتەتٸن دودالاردىڭ كورولٸ, تەننيس تاريحىنداعى ٷزدٸك ويىنشى دەپ ساناۋى تەگٸن ەمەس.
ن.دجوكوۆيچ «ٷلكەن دۋلىعا» جارىستارىندا 17 رەت توپ جاردى. دەگەنمەن ول فرانتسييا اشىق چەمپيوناتىندا بٸر-اق رەت جەڭٸمپاز اتاندى.
وسىعان دەيٸن قارسىلاستار 55 مەرتە ٶزارا كەزدەسسە, سونىڭ 29-ىندا 33 جاستاعى نوۆاك جەڭٸسكە جەتتٸ. ودان بٸر جاسقا ٷلكەن نادال 26 جەڭٸسٸنٸڭ كٶپشٸلٸگٸن توپىراق تٶسەنٸشٸندە قول جەتكٸزدٸ. جالپى, بۇل بەسەكەنٸ الىپتار شايقاسى دەۋگە بولادى.
بٸرٸنشٸ پارتييادا يسپانييالىق تەننيسشٸ سەربييالىقتىڭ بٸردە-بٸر گەيم الۋىنا مٷمكٸندٸك بەرگەن جوق – 6:0. مۇنداي ەسەپ مىقتىلار اراسىندا ٶتە سيرەك كەزدەسەدٸ.
ەكٸنشٸ سەتتە دە ر.نادال ايقىن باسىمدىلىق تانىتتى – 6:2.
ٷشٸنشٸ پارتييادا ەسەپ 2:2 بولعان مەزەتتە نادال برەيك جاساعانىمەن, دجوكوۆيچ سول بويدا قارىمتا قايىردى – 3:3. بۇل نوۆاكتىڭ ماتچتاعى العاشقى برەيگٸ ەدٸ. ەسەپ 5:5 بولعاندا, نادال قارسىلاسى قاتەلەسٸپ, جەتٸنشٸ برەيگٸنە قول جەتكٸزدٸ – 6:5. سودان كەيٸن ماتچتى ەيسپەن تٷيٸندەدٸ – 7:5.
فينالدىق جەكپە-جەك 2 ساعات 42 مينۋتقا سوزىلدى.
وسىلايشا ر.نادال رولان گارروس تۋرنيرٸنٸڭ 13 دٷركٸن چەمپيونى اتانىپ, «ٷلكەن دۋلىعا» جارىستارىنداعى جەڭٸسٸ (20) جٶنٸنەن شۆەيتسارييالىق رودجەر فەدەرەرمەن تەڭەستٸ.
قازاقستاندىقتار الەكساندر بۋبليك پەن ميحايل كۋكۋشكين فرانتسييا اشىق چەمپيوناتىندا ەكٸنشٸ اينالىمنان اسا المادى. ەندٸ ولار 12 قازان كٷنٸ باستالاتىن سانكت-پەتەربۋرگ اتر 500 تۋرنيرٸندە باق سىنايدى. ا.بۋبليك باستاپقى كەزدەسۋٸن امەريكالىق ماككەنزي ماكدونالدپەن, م.كۋكۋشكين سەربييالىق ميومير كەتسمانوۆيچپەن ٶتكٸزەدٸ.
