Qazaqstanǵa Ispaniiadan Plano a Plano jetekshi kinokompaniiasynyń kinematografisteri keldi, dep habarlaidy QazAqparat tilshisi.
«Dostarym, osydan biraz ýaqyt buryn Qazaqstanǵa Ispaniiadan madridtik Plano a Plano jetekshi kinokompaniiasynyń kinematografisteri kelgen bolatyn. Almaty, Qaraǵandy, Astana qalalarynda bolǵan olar bizdiń elge degen súiispenshiligin jasyra almady. Qazirgi tańda tarihi kinojoba boiynsha yntymaqtastyq múmkindigin talqylaýdamyz», - dep jazdy QR Mádeniet jáne sport ministri Arystanbek Muhamediuly Feisbýk paraqshasynda.
Ministrdiń aitýynsha, ispandyq prodiýserler Qarlag pen «ALJIR» mýzeilerine baryp, Qazaqstanǵa jer aýdarylǵan áskeri tutqyndar men qýǵyn-súrginge ushyraǵandar taqyrybyn tereń zertteýge kiristi. Film Qazaqstan tarihyndaǵy qiyn-qystaý kezeń 40-50-shi jyldar týraly bolmaq.
«Qazaqstanǵa Plano a Plano kinokompaniiasynyń Tsezar Benites, Emilio Amare, Hýan Karlos pen Rosio Martinez atty prodiýserleri men stsenariishileri keldi. Elimizge kelmes buryn olar ispandyq Enriko Gaspar Rodrigestiń «Qaraǵandyda umytylǵandar» derekti filmin kórip, ondaǵy tutqynǵa túsken ispandyqtardyń taǵdyry erekshe áser etipti. Olarmen Qazaqstan tarapynan «Jańa álem» prodakshn kompaniiasy kelissózder júrgizýde», - deidi ol.
Sondai-aq, A.Muhamediuly jaqynda qabyldanǵan «Kinematografiia týraly» zań kino salasyndaǵy halyqaralyq yntymaqtastyqty keńeitýge, sheteldik kinonaryq mamandaryn tartýǵa jáne Qazaqstandy halyqaralyq arenada kóbirek kórsetýge múmkindik beretinin aityp ótti.
«Qazaqstanǵa saparymyz biz úshi óte paidaly jáne áserli boldy. Sizderdiń uly elderińiz, onyń qiyn da qyzyq tarihy týraly bildik. Qazaqstan halqynyń qaiyrymdylyǵy, tarihy bizdi shabyttandyrdy, lokatsiialar da unady. Qazaqstanmen birlese repressiia kezindegi adamdar taǵdyry men qarym-qatynastaryn sýretteitin kórkem film túsirmekpiz. Biz ártúrlimiz, aiyrmashylyqtarymyz bar, biraq bizge ortaq dúnieleriz jeterlik», - dedi Plano a Plano kinokompaniiasynyń prodiýseri Tsezar Benites.
