Islamabad qalasynda uly oishyl ál-Farabidiń 1150 jyl tolýyna orai Ǵylymi-tehnologiialyq yntymaqtastyq jónindegi Islam yntymaqtastyǵy uiymynyń Turaqty komiteti (COMSTECH) jáne Qazaqstan Respýblikasynyń Úkimetiniń uiymdastyrýymen ál-Farabi jahandyq forýmy ótip jatyr, dep habarlaidy twesco.org saity.
Alqaly jiynǵa Pákistan Islam Respýblikasynyń Prezidenti Arif Alvi, COMSTECH direktory Muhammed Ikbal Chaýdari, Halyqaralyq Túrki akademiiasynyń prezidenti Darhan Qydyráli, Islam yntymaqtastyǵy uiymy Bas hatshysynyń orynbasary Asqar Mýsin, Qazaqstan Respýblikasynyń Saýd Arabiiasy Koroldigindegi, Bahrein Koroldigindegi Tótenshe jáne Ókiletti Elshisi Berik Aryn, Kaliforniia ýniversitetiniń professory Asad Ahmed, Lahor Menedjment jáne tehnologiialar ýniversiteti professory Said Nomanýl Hak, Oksford ýniversiteti professory Farhan Nizami, Miýnhen ýniversitetiniń professory Piter Adamson, Bat Spa ýniversiteti (Ulybritaniia) professory Iftihar Malik, sonymen qatar álemniń tanymal farabitanýshy ǵalymdary qatysty.
Halyqaralyq forýmnyń mártebeli qonaǵy bolǵan Akademiia basshysy Darhan Qydyráli quttyqtaý sóz sóilep, uiymnyń ál-Farabi jylynda atqarǵan jumystary týraly baiandap, jiynnyń sátti ótýine tilektestik bildirdi.
Aita ketý kerek, 1969 jylǵy 25 qyrkúiekte Rabat qalasynda ótken konferentsiiada negizi qalanǵan Islam yntymaqtastyǵy uiymy (IYU) – eń iri jáne yqpaldy úkimettik ári halyqaralyq musylman uiymy. Qazirgi ýaqytta ol jalpy sany shamamen 1,5 milliard adamdy qamtityn 57 eldiń basyn biriktirip otyr.
Sondai-aq Darhan Qydyráli Pákistan Islam Respýblikasynyń Syrtqy ister ministriniń birinshi orynbasary Sohail Mahmýdpen kezdesti.
Júzdesý barysynda taraptar ózara ǵylymi yntymaqtastyqty nyǵaitý máselelerin talqylady.
Sonymen qatar, Syrtqy ister ministriniń birinshi orynbasary búgin bastalǵan ál-Farabi jahandyq forýmyna joǵary baǵa berdi.
Óz kezeginde Darhan Qydyráli joǵarǵy deńgeide ótken kezdesýge rizashylyǵyn bildirip, Akademiia daiyndaǵan birqatar ǵylymi eńbekterdi tartý etti.
