Psiholog Nazym Esenovanyń qazaq áielderiniń tarihy, islam jáne táńirshildik týraly aitqan pikiri áleýmettik jelide qyzý talqyǵa tústi, dep habarlaidy ult.kz.
Psiholog Instagram paraqshasynda jariialaǵan videosynda ózin qazaq ekenin, alaida musylman emestigin ashyq aitty. Onyń sózinshe, buǵan deiin islamǵa uzaq ýaqyt boiy teris kózqarasta bolǵan, keiin onyń sebebin túsiný úshin tarihty zerttei bastaǵan.
Nazym Esenova ejelgi dala qoǵamyndaǵy áielderdiń áleýmettik róline de toqtaldy. Onyń aitýynsha, qazaq dalasyndaǵy áielder tek úi sharýasymen shektelmei, atqa minip, sadaq atyp, mańyzdy qoǵamdyq sheshimderge qatysqan. Ol Qazaqstan aýmaǵynan qarý-jaraqpen birge jerlengen áielderdiń qabirleri tabylǵanyn mysalǵa keltirdi.
Psiholog sondai-aq XIV ǵasyrda Deshti Qypshaq dalasyna barǵan saiahatshy Ibn Battýtanyń jazbalaryn sóz etti. Onyń aitýynsha, saiahatshy qypshaq áielderiniń atqa minip, júzderin jappai, erlermen qatar qoǵamdyq ómirge aralasqanyn jazǵan.
Odan bólek, Nazym Esenova qazaqtardyń kóne dúnietanymy retinde táńirshildik týraly pikir bildirdi. Ol táńirshildikti dástúrli dinnen góri tabiǵatpen úilesimdi ómir súrý tásili retinde sipattady.
Psiholog Qarahan memleketinde islamnyń memlekettik din retinde qabyldanýyn da sóz etti. Onyń paiymdaýynsha, bul sheshim arab álemimen saýda bailanystaryn nyǵaitýǵa baǵyttalǵan saiasi qadam bolǵan. Alaida bul tujyrym onyń jeke interpretatsiiasy ekenin atap ótken jón.
Nazym Esenova islamdaný úderisinen keiin dala áielderiniń qoǵamdyq róli ózgergen degen pikirin de bildirdi. Sondai-aq qazaqtyń keibir salt-dástúrlerinen kóne dúnietanymnyń belgilerin kórýge bolady dep esepteidi. Ol qyz qýý, bosanǵannan keiingi qyryq kúnge qatysty ǵuryptar men otpen alastaýdy mysal retinde keltirdi.
Psihologtyń bul pikiri jeli qoldanýshylaryn ekige bóldi.
Birqatar oqyrman onyń kózqarasyn qoldap, táńirshildik ózderine jaqyn ekenin jazdy. Al basqa qoldanýshylar islam týraly pikirlerimen kelispei, din tarihynda qoǵamdyq jáne ǵylymi ómirge belsendi aralasqan áielder bolǵanyn alǵa tartty.
