Ózbekstanda eldi 27 jyl boiy úzdiksiz basqarǵan tuńǵysh prezidentiniń jerleý rásimi ótti. Qyrkúiektiń 2-sinde 79 jasqa qaraǵan shaǵynda aýrýhanada insýlttan qaitys bolǵan prezidenttiń súiegi salynǵan tabytty Tashkentten Karimovtiń týǵan jeri Samarqanǵa búgin ákeldi. Elde úsh kúndik aza tutý jariialandy.
Tashkentte aýrýhanadan áýejaiǵa deiin qaraly kortej júrip ótken jol boiyna myńdaǵan jergilikti turǵyn shyqty. Ózbekstan telearnasy prezidenttiń jubaiy Tatiana Karimova men ekeýiniń kenje qyzy Lola Karimova-Tilliaevanyń marqumnyń tabytynyń sońynan erip kele jatqan sátin kórsetti. Samarqanda Karimovtiń súiegi salynǵan tabytty myńdaǵan turǵyn kútip aldy. Kóptegen adam qaiǵyryp, jylap turdy, jurt kortej júrip ótken joldyń boiyna gúl qoiyp jatty.
Jerleý rásimi belgili Registan alańynda ótti. Ózbekstannyń tuńǵysh prezidentin orta ǵasyrda ómir súrgen qairatkerler men Islam Karimovtiń áke-sheshesi jerlengen Shahi-Zinda tarihi ziratyna jerledi. Keiingi 20 jylda eshkim jerlenbegen ziratqa endi Karimovtiń ózi qoiyldy.
30 milliondai halqy bar eldi ótpeli kezeńde kim basqaratyny Islam Karimovti jerlegen kúni beimálim boldy. Karimov halyqty ainalasyndaǵy jaqyn adamdarymen birge avtoritarlyq rejim ornatyp basqardy, al rejimge kónbegender eldiń qaýipsizdik qyzmetiniń qýdalaýyna ushyrady.
Eger el prezidenti óz mindetin atqara almaityn bolsa, Ózbekstan konstitýtsiiasy boiynsha onyń ókilettigi úsh aiǵa parlamenttiń joǵarǵy palatasynyń tóraǵasyna júkteledi. Qazir ol qyzmette Nigmatilla Iýldashev otyr. Islam Karimovti jerleý rásimin uiymdastyrý komissiiasyn premer-ministr Shavkat Mirziaev basqardy.
Ózbekstan prezidenti Islam Kárimovti sońǵy saparǵa shyǵaryp salǵan kúni. Tashkent, 3 qyrkúiek 2016 jyl.
Islam Karimovti jerleý rásimine qazaqstandyq delegatsiiany premer-ministr Kárim Másimov bastap bardy. Qyrǵyzstan men Reseiden de prezident emes, premer-ministrler deńgeiindegi delegatsiialar bardy. Qytaida resmi saparda júrgen Qazaqstan prezidenti Nursultan Nazarbaev buǵan deiin Ózbekstan parlamenti senatynyń tóraǵasy Nigmatilla Iýldashevke kóńil aityp, jedelhat joldaǵan. Samarqandaǵy jerleý rásimine Tájikstan prezidenti Emomali Rahmon qatysty. Azattyqtyń Orys qyzmetiniń habarlaýynsha, Resei prezidenti Vladimir Pýtin «jumys kestesi tyǵyz» degen ýájben jerleýge barmaǵan. Resei delegatsiiasyn premer-ministr Dmitrii Medvedev bastap bardy. Karimovti jerleý rásimine arasynda Aýǵanstan, Ortalyq Aziia elderi, Grýziia, Ońtústik Koreia, Belarýs jáne Ýkraina ókilderi bar álemniń 17 elinen delegatsiia bardy.
Islam Qarimovtiń qazasyna orai Qytai prezidenti Si Tszinpin ol Ózbekstannyń «damýy men órkendeýine tarihi úles qosty» dep málimdedi. AQSh prezidenti Barak Obama «Ózbekstan óz tarihynyń jańa taraýyn bastaidy, al AQSh Ózbekstanmen áriptestigin jalǵastyra beredi ári bul eldiń bolashaǵy azamattarynyń quqyǵyn qorǵaýǵa negizdeledi» dep biletini jaily málimdegen.
