Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly islam elderinde jemqorlarǵa qandai jaza qoldanylatyndyǵyn aitty, dep habarlaidy QazAqparat.
«Islam memleketi nemese islam memleketi emes dep bólýge de bolmaityn shyǵar. Óitkeni, árbir memlekette jemqorlyq úlken kúná bolyp sanalady. Barlyq memlekette jaza qatal. Elimizde de Memleket basshysy Qasym-Jomart Toqaev jemqorlyqpen sottalǵan adamdardyń jazasyn óteý merzimin qysqartý bolmaityndyǵyn aitty. Bul da elimizdegi jemqorlarǵa jazanyń qatańdyǵyn kórsetedi. Al musylman elderinde darǵa asý jazasy qoldanatyndar bar. Keibir elde qol kesý jazasy qoldanylady. Myna kórshi Qytai elinde de jemqorlyqqa jaza óte qatań. Sondyqtan islammen ǵana ólsheýge bolmas. Barlyq jerde óz eliniń damýyna qarsylarǵa zań qatań deýge bolar» - dedi QMDB tóraǵasy QR Sybailas jemqorlyqqa qarsy is-qimyl agenttigi alańynda ótken brifing barysynda.
Osy oraida Bas múfti Allaǵa sengen, imandy adam jemqorlyqqa barmaityndyǵyn basa aitty. Sonymen qatar ol Qazaqstan musylmandary dini basqarmasy óz jumysynda birneshe baǵytqa basymdyq beretindigin, onyń biri rýhani ilim beretin Ihsan baǵyty ekendigin atap ótti.
«Ihsan ilimi boiyna sińgen adam jemqorlyqqa jolamaq túgili onyń atyn da estýge jirenetin bolady. Ihsan búgin ǵana paida bolǵan termin emes. Ol musylmandyq joldy ustanǵan qazaq halqynyń baǵzy zamannan jaqsy meńgergen joly», - dedi Naýryzbai qajy Taǵanuly.
