قازاقستان مۇسىلماندارى دٸني باسقارماسىنىڭ تٶراعاسى, باس مٷفتي ناۋرىزباي قاجى تاعانۇلى يسلام ەلدەرٸندە جەمقورلارعا قانداي جازا قولدانىلاتىندىعىن ايتتى, دەپ حابارلايدى قازاقپارات.
«يسلام مەملەكەتٸ نەمەسە يسلام مەملەكەتٸ ەمەس دەپ بٶلۋگە دە بولمايتىن شىعار. ٶيتكەنٸ, ەربٸر مەملەكەتتە جەمقورلىق ٷلكەن كٷنە بولىپ سانالادى. بارلىق مەملەكەتتە جازا قاتال. ەلٸمٸزدە دە مەملەكەت باسشىسى قاسىم-جومارت توقاەۆ جەمقورلىقپەن سوتتالعان ادامداردىڭ جازاسىن ٶتەۋ مەرزٸمٸن قىسقارتۋ بولمايتىندىعىن ايتتى. بۇل دا ەلٸمٸزدەگٸ جەمقورلارعا جازانىڭ قاتاڭدىعىن كٶرسەتەدٸ. ال مۇسىلمان ەلدەرٸندە دارعا اسۋ جازاسى قولداناتىندار بار. كەيبٸر ەلدە قول كەسۋ جازاسى قولدانىلادى. مىنا كٶرشٸ قىتاي ەلٸندە دە جەمقورلىققا جازا ٶتە قاتاڭ. سوندىقتان يسلاممەن عانا ٶلشەۋگە بولماس. بارلىق جەردە ٶز ەلٸنٸڭ دامۋىنا قارسىلارعا زاڭ قاتاڭ دەۋگە بولار» - دەدٸ قمدب تٶراعاسى قر سىبايلاس جەمقورلىققا قارسى ٸس-قيمىل اگەنتتٸگٸ الاڭىندا ٶتكەن بريفينگ بارىسىندا.
وسى ورايدا باس مٷفتي اللاعا سەنگەن, يماندى ادام جەمقورلىققا بارمايتىندىعىن باسا ايتتى. سونىمەن قاتار ول قازاقستان مۇسىلماندارى دٸني باسقارماسى ٶز جۇمىسىندا بٸرنەشە باعىتقا باسىمدىق بەرەتٸندٸگٸن, ونىڭ بٸرٸ رۋحاني ٸلٸم بەرەتٸن يحسان باعىتى ەكەندٸگٸن اتاپ ٶتتٸ.
«يحسان ٸلٸمٸ بويىنا سٸڭگەن ادام جەمقورلىققا جولاماق تٷگٸلٸ ونىڭ اتىن دا ەستۋگە جيرەنەتٸن بولادى. يحسان بٷگٸن عانا پايدا بولعان تەرمين ەمەس. ول مۇسىلماندىق جولدى ۇستانعان قازاق حالقىنىڭ باعزى زاماننان جاقسى مەڭگەرگەن جولى», - دەدٸ ناۋرىزباي قاجى تاعانۇلى.
