Alakól búginde Qazaqstandaǵy eń tanymal týristik baǵyttardyń birine ainaldy. Jyl saiyn kól jaǵalaýyna keletin demalýshylar sany artyp, óńirdiń týristik áleýeti kúsheiip keledi. 2026 jyly óńirge rekordtyq 2 million týrist keledi dep kútilýde. Tabiǵatynyń kórkemdigi, emdik qasieti bar sýy jáne jańaryp jatqan infraqurylymy Alakóldi otandyq týrister úshin tartymdy demalys ornyna ainaldyrdy.
Alakóldiń basty ereksheliginiń biri – mineraldarǵa bai sýy men erekshe tabiǵaty. Mamandardyń aitýynsha, kól sýy men jaǵalaýyndaǵy klimat aǵzany qalpyna keltirýge qolaily. Sondyqtan munda tek demalyp qana qoimai, densaýlyǵyn nyǵaitý maqsatynda keletinder de az emes. Týrizmniń damýy óńir ekonomikasyna da oń áserin tigizýde. Jańa jumys oryndary ashylyp, shaǵyn jáne orta biznes qarqyndy damyp keledi. Jergilikti kásipkerler týristerge arnalǵan qyzmet túrlerin keńeitip, ulttyq taǵamdar, ekskýrsiialar, sýdaǵy oiyn-saýyq pen belsendi demalys baǵyttaryn usynýda.
Sońǵy jyldary Alakólge jetý de áldeqaida jeńildedi. Týristik maýsymda temirjol baǵyttarynyń sany kóbeiip, áýe reisteri uiymdastyrylyp, avtojoldar jańǵyrtylýda. Bul elimizdiń túkpir-túkpirinen keletin demalýshylar úshin qolaily jaǵdai qalyptastyrdy.
Alakóldiń damýy tsifrlyq tehnologiialarmen de tyǵyz bailanysty. Óńirdi damytýdyń master-jospary boiynsha zamanaýi týristik-rekreatsiialyq aimaq qurý kózdelgen. Joba táýligine 75 myń týrist qabyldai alatyn infraqurylym qalyptastyrýdy qamtidy. Onyń ishinde jaǵalaýdy nyǵaitý, kóshelerdi abattandyrý, kólik júiesin jetildirý, tsifrlyq servisterdi engizý jáne turaqty internetpen qamtamasyz etý qarastyrylǵan.
