Mektepke deiingi uiymdar jelisine 3 – 6 jastaǵy balalardyń 95,2 paiyzy qamtylǵan. Bul týraly QR Parlamenti Májilisi tóraǵasynyń orynbasary Gúlmira Isimbaeva málim etti, dep habarlaidy QazAqparat.
«Bizdiń memleketimiz árdaiym bilim men ǵylym salasyna erekshe kóńil bólip, qomaqty qarjy jumsap, ony damytý sharalaryn iske asyryp keledi. Sonyń biri - Qazaqstan Respýblikasynda bilim berýdi jáne ǵylymdy damytýdyń 2016 – 2019 jyldarǵa arnalǵan memlekettik baǵdarlamasy.
Búgingi kúni, Bilim jáne ǵylym ministrliginiń aqparaty boiynsha, baǵdarlamanyń basym bóligi iske asyrylyp, kórsetkishter oryndalyp jatyr jáne onyń belgili bir nátijeleri de bar. Máselen, mektepke deiingi uiymdar jelisi kóbeiip, 3 – 6 jastaǵy balalardyń 95,2 paiyzyn qamtýǵa múmkindik bergen. Qamtý deńgeii joǵary, biraq áli 500 myńnan astam bala óz kezegin kútip otyr. Onyń ishinde 1 – 3 jas aralyǵyndaǵy 437 myń bala bar. Osy sanattaǵy balalardy tolyq qamtý turǵysynan tiisti sharalar qabyldap, olardyń da esebin júrgizý qajet», - dedi G. Isimbaeva Bilim berýdi jáne ǵylymdy damytýdyń 2016-2019 jyldardaǵy baǵdarlamanyń iske asyrylýyna arnalǵan Májilistegi Úkimet saǵatynda.
Onyń sózine qaraǵanda, balabaqshalardy tiisti mamandyǵy bar kadrlarmen qamtý boiynsha josparlanǵan 50 paiyzdyq kórsetkishi artyǵymen oryndalyp, qazir 60 paiyzǵa jýyqtap qaldy.
«Degenmen, mektepke deiingi uiymdarda bala tárbiesimen jáne olardy oqytýmen ainalysatyn qyzmetkerlerdiń 40 paiyzǵa jýyǵynda tiisti bilimniń bolmaýy alańdatady. Al mektepke deiingi bilim berý bastaýysh bilim sekildi - tutas bilim berýdiń negizi bolyp tabylady. Mektepke deiingi uiymdardy bilikti mamandarmen qamtamasyz etý - bilim berý júiesiniń basym mindetteriniń biri bolýǵa tiis», - dedi Májilis tóraǵasynyń orynbasary.
