Atyraý oblysyna saparmen kelgen Ishki ister ministri Erlan Turǵymbaev óńirdiń tártip saqshylarymen keńes ótkizdi, dep habarlaidy "Ult aqparat".
Erlan Turǵymbaev Atyraýda azamattardy táýlik boiy qabyldaityn 7 jańa modýldik politsiia beketiniń jumysyn tekserdi.
«Prezident Qasym-Jomart Toqaevtyń tapsyrmasyna sáikes, biz politsiianyń servistik modeline kóshýdi júzege asyrýdamyz. Onyń negizgi qaǵidattarynyń biri - «halyqqa jaqyn politsiia«. Qazirgi zamanǵy modýldik beketter tiimdiligin dáleldedi. Óitkeni, mundai beketter ornatylǵan aýdandarda quqyqbuzýshylyqtar sany aitarlyqtai tómendedi. Jalpy, quqyq qorǵaý organdary turǵyndarmen tyǵyz jumys isteitin jerde qylmysqa qarsy kúrestiń oń nátijesin kórip otyrmyz. Azamattar ishki ister organdary júiesinde oń ózgeristerdi kórip, óz bastamalaryn da usynyp, tártip saqshylarymen yntymaqtastyqta bolýǵa múddelilik tanytyp otyr. Óitkeni, azamattar úshin qoǵamdaǵy qaýipsizdik pen turaqtylyq qashan da zor mańyzǵa ie» - dedi ministr E.Turǵymbaev.
Aldaǵy ýaqytta Atyraý oblysynda taǵy 17 zamanaýi statsionarlyq beket ornatý josparlanýda. Olar eń kriminogendik aýdandarda jáne adamdar kóp jinalatyn oryndarda ashylady.
Sondai-aq, IIM basshysy jergilikti politsiia qyzmetiniń reformasyna nazar aýdardy.
«Bizdiń basty mindetimiz – azamattardyń qaýipsizdigi. Sondyqtan, ýchaskelik inspektordyń qyzmet kórsetetin ákimshilik aýmaqta turaqty bolýyna jaǵdai jasaimyz» – dedi ol.
Keńeste Atyraý oblystyq Politsiia departamentiniń bastyǵy Hamza Úmbetqaliev óńirde jergilikti ákimdiktiń qoldaýymen 34 jańa ýchaskelik politsiia beketiniń qurylysy aiaqtalǵanyn baiandady.
«Onyń 22-si ýchaskelik politsiia inspektorlarynyń jumysyn yńǵaily ári jedel etý úshin turǵyn úilermen biriktirildi» - dedi ol.
IIM basshysy politsiia departamentiniń birqatar nysanyn aralap, qyzmet barysymen tanysty. Atap aitqanda, Atyraý qalasynyń Jedel basqarý ortalyǵynyń jumysyn tekserdi. JBO mamandary 3607 beinebaqylaý kamerasyn baqylaidy. Onyń 859-y qoǵamdyq qaýipsizdikti qamtamasyz etýge jumyldyrylǵan. Ótken jyly oblysta beinemonitoring júiesiniń kómegimen 286 qylmys ashylǵan.
Ministr ishki ister organdarynyń bólimderinde jappai beinebaqylaý ornatýdy jedeldetýdi tapsyrdy. Soǵan orai Atyraý oblysynyń politsiia nysandarynda 265 beinekamera ornatylatyn bolady.
