Ishki ister ministrligi aliment tóleýden qashqan ákelerdi bes táýlikke qamaýǵa alýdy usynyp otyr, dep habarlaidy Sputnik Qazaqstan.
Búgin Májilistegi Úkimet saǵatynda jeke sot oryndaýshylar institýtyn odan ári damytý máseleleri talqylandy. Suraq-jaýap barysynda depýtat Gúlnár Bijanova aliment boiynsha bereshegi bar ákelerdi izdeý máselesin kóterdi.
"Búginde politsiia bólimderi aliment tólemeitinderdi óndirip alýshynyń turǵylyqty mekenjaiy boiynsha ǵana izdeidi. 2018 jyly 1864 boryshker ákege izdeý salynyp, onyń tek 78-i anyqtalǵan, iaǵni 9 protsenti. Qalǵandary boiynsha izdeý jumystary toqtatyldy. Osyǵan bailanysty suraq: boryshkerlerdi izdestirý tetigi nege ózgertilmeidi?", - dep surady Bijanova.
Ishki ister ministriniń birinshi orynbasary Marat Qojaevtyń aitýynsha, izdeý qaida jariialanǵanyna qaramastan, politsiia bólimderi boryshkerlerdi búkil eldiń aýmaǵynan izdeidi.
Boryshker azamattyq-quqyqtyq qatynastar isi boiynsha jaýapty bolǵandyqtan, olardy izdeý qylmyskerlerdi izdestirý jolynan ózgeshe. Iaǵni, politseiler arnaiy jedel sharalaryn ótkizip, boryshkerlerdi ustai almaidy. Tek sot oryndaýshyǵa kelýge mindetteidi.
Osyǵan bailanysty Ishki ister ministrligi balalaryna aliment tóleýden jaltarǵan ákelerdi bes táýlikke qamaýǵa alýdy usynyp otyr.
"Ákimshilik kodekske jaýapkershilik pen azamattardy ustaý múmkindigin engizý qajet. Sot sheshimin oryndamaǵany úshin jaýapkershilikti, máselen, bes táýlikke engizýge bolady. Osy ýaqyt ishinde sot oryndaýshylary boryshkermen qajetti shekteý sharalaryn júrgizer edi. Ol adam da, bálkim, is-áreketiniń zańǵa qaishy ekenin túsinip, bir sheshimge keler", - dedi Qojaev.
