IIM Tergeý departamentiniń basshysy Sanjar Ádilov «Garant 24 Lombard» qarjy piramidasy isine qatysty mán-jaidy aitty, dep habarlaidy "Ult aqparat".
«Garant 24 Lombard» qarjy piramidasyn uiymdastyrýshylarǵa qatysty qylmystyq is aiaqtaldy. Osy is boiynsha 18 myńnan astam adam shaǵymdandy, keltirilgen shyǵynnyń jalpy somasy 22 mlrd teńgeden astam. Qylmystyq isti tergeý úshin Ishki ister ministrliginiń arnaiy jedel toby quryldy, oǵan 150-den astam qyzmetker endi», - dedi S. Ádilov ministrlik uiymdastyrǵan onlain brifingide.
Onyń aitýynsha, is boiynsha qylmystyq árekettiń 33 epizody tirkeldi. Qazirgi kezde qylmystyq jaýapkershilikke 56 adam tartylýda. Bes adamǵa qatysty izdeý jariialandy.
«Ministrlik tarapynan jedel izdestirý sharalary iske asyryldy. Izdestirilgen adamdardyń kóbisi Qazaqstan aýmaǵynan tys jerde anyqtalyp, ustaldy. Moldova, Qyrǵyzstan jáne Túrkiiaǵa saparlar jasalyp, osy elderden izdeýdegi adamdar jetkizildi. Kúdiktilerden 70 mln teńgeden astam qarjy, qylmystyq áreketteri kezinde satyp alynǵan túrli múlik nysandary alyndy», - dedi departament basshysy.
Osy oraida 15 avtomobil, eki júk kóligi, eki avtokran, 29 páter men jeke turǵyn úi, úsh jer telimi, bes avtoturaq orny, bir dámhana-biliard kesheni qamtyldy.
Kúdiktilerdiń arestke qoiylǵan múlkiniń jalpy quny 22 mlrd teńgeden astam somaǵa baǵalanǵan.
«Tergeý amaldary barysynda tórt úige, 140 páterge, 1572 avtomashinaǵa qatysty arestke qoiý shararasy qabyldandy. Kompaniianyń barlyq keńselerinde tekserý júrgizilip, zattai aiǵaqtar alyndy. Qazirgi kezde barlyq kúdiktilerge qatysty tergeý aiaqtaldy. Zardap shekkender men kúdiktiler qylmystyq isterdiń materialdarymen tanysýǵa kiristi», - dedi S. Ádilov.
