Foto: Akorda.kz
Memleket basshysy Ishki ister ministri Marat Ahmetjanovty qabyldady, - dep habarlaidy "Ult aqparat" Aqordanyń resmi saityna silteme jasap.
Prezidentke elimizdegi kriminogendik ahýal jóninde jáne 30 maýsymda ótken Ishki ister ministrliginiń keńeitilgen alqa otyrysynda berilgen tapsyrmalardyń oryndalý barysy týraly málimet berildi.
Kezdesýde Qasym-Jomart Toqaevqa qylmys sanynyń azaiǵany jóninde baiandaldy. Marat Ahmetjanovtyń aitýynsha, kisi óltirý, buzaqylyq, urlyq, qaraqshylyq, tonaý, mal urlyǵy jáne densaýlyqqa aýyr zaqym keltirý jáne basqa da qylmystar aitarlyqtai azaiǵan.
Prezidentke elordada júzege asyrylyp jatqan CyberPol jobasynyń nátijeleri tanystyryldy. Joba internet-alaiaqtyqqa qarsy is-qimyldy jetildirýge baǵyttalǵan.
Sonymen qatar ministr esirtki qylmysyna qarsy kúres baǵytynda júrgizilip jatqan jumystardyń qorytyndysy týraly esep berdi. Jyl basynan beri quqyq qorǵaý jáne arnaýly organdardyń birlesken kúsh-jigeriniń nátijesinde 14,3 tonna esirtki, sonyń ishinde 71,5 kg geroin, 652 kg sintetikalyq esirtki tárkilendi. IIM kúshteri 52 esirtki zerthanasyn joiyp, 85 tonna prekýrsor tárkiledi.
Budan bólek, uiymdasqan qylmystyq toptardyń áreketteri boiynsha 37 qylmystyq is tergelip jatyr. Adam saýdasyna bailanysty 111 qylmys anyqtaldy.
Prezidentke otbasylyq-turmystyq salada zorlyq-zombylyq jasaǵandarǵa qatysty jaýapkershilikti qatańdatý sharalary týraly da aityldy. Qazir mundai quqyqbuzýshylyqtar jábirlenýshiniń aryz-shaǵymynsyz tirkelip, is qozǵala beredi.
Memleket basshysyna jol-kólik oqiǵalarynyń aldyn alý jáne sheteldik avtokólikterdi zańdastyrý jumystarynyń nátijeleri týraly baiandaldy.
Kezdesý sońynda Prezident quqyq qorǵaý organdaryna azamattardyń konstitýtsiialyq quqyqtarynyń qatań saqtalýyn qamtamasyz etýdi tapsyrdy. Sonymen birge Qasym-Jomart Toqaev IIM basshylyǵyna quqyqtyq tártip pen qoǵamdyq qaýipsizdik deńgeiin odan ári arttyrý jóninde birqatar mindet júktedi.
