Qyzylordada №1 jolaýshylar avtobýsy júrip bara jatqan kezde órtendi. Oqiǵa kezinde ishinde 16 adam bolǵan, - dep habarlaidy Tengrinews.kz tilshisi.
Qyzylorda oblysy órt sóndirý jáne avariialyq-qutqarý qyzmetiniń baspasóz qyzmeti málimetinshe, oqiǵa búgin, iaǵni 1 aqpanda, saǵat 13.37-de sol jaǵalaýdy oń jaǵalaýmen jalǵaityn kópirde bolǵan.
"Qyzylorda" avtobýs parki" JShS-ne tiesili № 1 avtobýs tolyq janyp ketti. Avtobýs markasy - Zhong Tong Bus. Ishinde 16 jolaýshy bolǵan, barlyǵy óz betimen shyqqan", - dedi vedomstvonyń baspasóz hatshysy Áliia Erejepova.
Saǵat 13.53-te órt aýyzdyqtaldy. Órt sóndirýshiler órttiń sebebin anyqtaidy.
"Aldyn ala boljam boiynsha, qozǵaltqyshtyń qysqa tuiyqtalýynan órt shyqty", - dedi vedomstvonyń baspasóz qyzmeti ókili.
Jolaýshylardyń eshqaisysy zardap shekpegen. Oqiǵa ornyna órt sóndirý jáne avariialyq-qutqarý qyzmetiniń toǵyz qyzmetkeri men úsh tehnikasy bardy.
