Jańa oqý jyly qarsańynda Astana ákimi Áset Isekeshev qoǵamdyq kólik máseleleri týraly jinalys ótkizdi, dep habarlaidy "Ult aqparat" ákimdiktiń baspasóz qyzmetine silteme jasap.
Jinalysta qala basshysy qala ákimi orynbasarynyń, Kólik jáne jol-kólik infraqurylymyn damytý basqarmasynyń, «Astana LRT» JShS men astanalyq avtobýs parkteriniń jumysyn qatań synǵa aldy.
«Barlyq máselelerdi oqý jyly bastalǵansha sheshý kerek. Validatorlardyń jumys istemeýinen adamdar avtobýs kútip turmaýy kerek», - dedi Áset Isekeshev.
Onyń aitýynsha, memleket qoǵamdyq kóliktiń jumysyn sýbsidiialaý úshin qajetti qarajat bólip otyr. Jelide avtobýstardy 90-95% qamtamasyz ete almaityn, elorda jolaýshylaryna yńǵaily jáne qaýipsiz qyzmet kórsete almaityn avtobýs parkteri kelisimsharttan aiyrylyp, ózge avtoparkterge ornyn bosatýy tiis.
Ákim barlyq validatorlardyń jumysyn retteýdi tapsyrdy, al olar isten shyqqan jaǵdaida avtobýsty kúttirip qoimai, barlyq jolaýshylar tegin júrýi tiis.
«Validatorlar turaqty jumys istemese, jolaýshylardy tegin tasyńdar», - dedi Isekeshev.
Sonymen birge ákim avtobýs qozǵalysyn baqylaýǵa arnalǵan GPS monitoringiniń jumys istemeitinin, munyń jolaýshylarǵa qolaisyzdyqtar týdyratynyn atap ótti. Elektrondyq tablodan aiyrmashylyq 3-5 minýttan aspaýy kerek.
Sondai-aq, ákim «Astana LRT» JShS-ge tamyz aiynyń sońyna deiin jolaqyny QR kod, smartfon jáne internet-banking arqyly tóleýge múmkindik beretin qosymsha múmkindikter ázirleýdi tapsyrdy.
Óz kezeginde avtopark ókilderi elektrondy tólemdi engizý arqyly qarjy ainalymynyń 30% artqanyn, bul qarajatqa qyzmet kórsetý sapasyn jaqsartyp, biliktiligi joǵary júrgizýshilerdi kóbeitetinin atap ótti. Elektrondy tólemniń arqasynda júrgizýshilerdiń eńbekaqysy 300-400 myń teńgege deiin artqan.
Sondai-aq, avtopark basshylary qoǵamdyq kólikte biletsiz jolaýshylardyń sany artqanyn, máseleni sheshý úshin kóliktik inspektsiia men jergilikti politsiia qyzmetiniń kómekke kelýin surady.
