Nur-Sultan qalasynda Qazaqstan Prezidentiniń kómekshisi – Qaýipsizdik Keńesiniń hatshysy Áset Isekeshev Aýǵanstan Prezidentiniń ulttyq qaýipsizdik jónindegi keńesshisi Hamdýlla Mohibpen kelissóz júrgizdi, dep habarlaidy "Ult aqparat" Aqordanyń resmi saityna silteme jasap.
Atalǵan is-shara Qazaqstan Respýblikasynyń Prezidenti Qasym-Jomart Toqaev pen Aýǵanstan Islam Respýblikasynyń Prezidenti Ashraf Ǵani arasyndaǵy qol jetkizilgen ýaǵdalastyqtar aiasynda ótti.
Kelissóz barysynda taraptar óńirlik jáne jahandyq qaýipsizdiktiń jai-kúii, Ortalyq Aziiadaǵy qazirgi syn-qaterler, halyqaralyq uiymdar aiasyndaǵy yntymaqtastyqty odan ári nyǵaitý baǵyttary jóninde pikir almasty. Sondai-aq Aýǵanstannan AQSh pen onyń NATO-daǵy odaqtastary áskerleriniń shyǵýyna bailanysty ahýaldyń damý barysy, búkil óńirdiń qaýipsizdigi boiynsha eldiń ornyqty damýyn qamtamasyz etý perspektivalary talqylandy.
Áset Isekeshev Hamdýlla Mohibty óńirlik turaqtylyqtyń negizgi máselelerine qatysty elimizdiń ustanymy týraly habardar etip, Aýǵanstandaǵy jaǵdaidy retteý jónindegi halyqaralyq kúsh-jiger BUU qamqorlyǵymen ótýi tiis ekenin atap ótti.
Aýǵanstan Islam Respýblikasy Prezidentiniń Ulttyq qaýipsizdik jónindegi keńesshisi óz kezeginde aýǵanishilik retteý jónindegi beibit úderistiń barysyn egjei-tegjeili baiandady.
Budan bólek áskeri jáne áskeri-tehnikalyq saladaǵy yqpaldastyqtyń aspektileri, esirtki tasymaly men zańsyz kóshi-qonǵa qarsy is-qimyl máseleleri jáne basqa da ózekti syn-qaterler qarastyryldy.
Kelissóz sońynda taraptar Ortalyq Aziia óńirindegi qaýipsizdikti qamtamasyz etý úshin eki el arasyndaǵy yntymaqtastyqty arttyrýǵa nietti ekenin naqtylady.
