QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda sýarylatyn jerlerdiń irrigatsiialyq infraqurylymyn jańǵyrtý máselesi qaraldy, dep habarlaidy "Ult aqparat" primeminister.kz saityna silteme jasap.
Geologiia, ekologiia jáne tabiǵi resýrstar ministri Maǵzum Myrzaǵaliev, aýyl sharýashylyǵy ministri Saparhan Omarov, sondai-aq Túrkistan jáne Qyzylorda oblystarynyń ákimderi Ómirzaq Shókeev pen Gúlshara Ábdiqalyqova baiandama jasady.
Qazaqstanda 2020-2021 jyldary 6 785 kilometr kanal, 4 sý qoimasy, 4 sý toraby, 239 tik drenaj uńǵymasy jáne 23 myń ózge de sý sharýashylyǵy qurylystary qaita jańartylady.
Irrigatsiialyq infraqurylymdy damytý men jańǵyrtý jobalaryn iske asyrý 2020-2021 jyldary Almaty, Jambyl, Túrkistan, Qyzylorda jáne Aqtóbe oblystarynda qosymsha 500 myńdai gektar sýarmaly jerdi paidalanýǵa múmkindik beredi. Buǵan shamamen 274 mlrd teńge kózdelgen. 88 myń jumys orny qurylady, oǵan qurylys jáne jóndeý jumystary kezindegi 11 myń jumys orny jáne 77 myń turaqty jumys orny kiredi.
Osy ainalymǵa engiziletin jerlerdegi aýyl sharýashylyǵy jalpy óniminiń kólemi jylyna 165 mlrd teńgeni quraidy jáne saýda, ónimdi óńdeý, mal sharýashylyǵy salalarynda mýltiplikativtik áser etedi.
«QR Prezidenti Qasym-Jomart Kemeluly Toqaev óz Joldaýynda 2030 jylǵa qarai sýarmaly jerlerdiń kólemin 1,5 mln gektardan 3 mln ga deiin birtindep ulǵaitý qajettiligin atap ótti», — dedi A. Mamin.
Premer-Ministr sýarmaly jerlerdiń infraqurylymyn aýqymdy túrde keńeitý agroónerkásiptik keshendi damytýǵa eleýli serpin beretinin, ol el ekonomikasynyń qurylymynda mańyzdy sektorǵa ainalýy tiis ekenin atap aitty.
«Qabyldanatyn sharalar 2024 jylǵa qarai jemis-kókónis ónimderi boiynsha importty júz paiyz almastyrýǵa múmkindik jasaidy», — dedi A. Mamin.
Úkimet basshysy ekologiia, aýyl sharýashylyǵy ministrlikterine, ákimdikterge irrigatsiialyq infraqurylymdy damytý jáne jańǵyrtý jobalaryn iske asyrýdy tezdetip bastaýdy, sondai-aq qarajattyń tiimdi igerilýine tiisinshe baqylaý júrgizýdi qamtamasyz etýdi tapsyrdy. Bul rette jumys oryndaryn saqtaýǵa jáne jańa jumys oryndaryn qurýǵa erekshe kóńil bólinýi qajet.
«Aýyl sharýashylyǵy ministrligi ákimdiktermen birlesip, paidalanýǵa beriletin sýarmaly jerlerdi barynsha jáne sózsiz igerý boiynsha jumys júrgizsin. Óńirler jer ýchaskelerin ýaqytynda bólý, fermerlik alqaptarǵa qajetti infraqurylymdy jetkizý boiynsha barlyq sharalardy qabyldaýy qajet», — dedi A. Mamin.
