QR Prezidenti janyndaǵy Memlekettik basqarý akademiiasynyń baspasóz hatshysy Aqerke Berlibai Prezidenttik jastar kadr rezervi týraly pikir bildirdi, dep habarlaidy QazAqparat.
«Men - osy jobany uiymdastyrýshylardyń birimin. Bul jobanyń kontseptsiiasyn qurýdan bastap búginge deiin qandai protsester bolǵanyn basynan aiaǵyna deiin kórdim. Shynymen de, bul - biregei joba. Sondai-aq irikteý kezeńderi ashyq ári ádil ótti. Bizdiń úmitimiz aqtaldy, sebebi bul jobaǵa qazaqstandyq qana emes, sheteldik jastardyń da qyzyǵýshylyǵy joǵary boldy», - deidi Aqerke Berlibai.
Onyń aitýynsha, baiqaý jariialanǵan kezde 13 myńnan astam adam ótinim bergen.
«7312 adam tolyq tirkelip, birinshi kezeńge ótti. Mine, osy adamdar jobaǵa ne maqsatpen qatysyp jatqanyn, jobadan ne kútetinin anyq bildi. Al sońǵy kezeńnen súrinbei ótken 300 qatysýshynyń bolashaǵy jarqyn, sebebi olar - talantty, óte aqyldy, bilikti mamandar. Men olardyń árqaisysyn jeke tanimyn, sebebi ártúrli kezeńderde olarmen sóilesip, suhbat aldym», - deidi baspasóz hatshysy.
Sondai-aq, ol jobaǵa memlekettik qyzmetshiler ǵana qatyspaǵanyn aitty.
«Irikteýden ótken 300 adamnyń 96-sy ǵana - memlekettik qyzmetshiler. Kóbi jeke sektordan qatysýshylar. Prezidentimiz Qasym-Jomart Toqaev memlekettik qyzmettiń ashyq bolǵanyn qalap, qalyptasyp qalǵan stereotipterdi buzǵysy kelse, iriktelgen 300 adam osy talaptarǵa tolyq sai keledi. Olar memlekettik qyzmettegi stereotipterdi joiyp, ishinen memlekettik qyzmet salasyn ózgertetin jańa kóshbasshylar shyǵady», - deidi ol.
