Tegeran-Kiev reisinde jumys istegen "Ýkrainanyń halyqaralyq áýe jelileri" kompaniiasynyń bortserikteriniń biriniń kúieýi ushaqtyń qulaǵanyn áýejaida jýrnalisterden bilgen, dep habarlady RIA Novosti.
Er adam aty-jónin aitýdan jáne jazý qurylǵysyna sóileýden bas tartty. Tilshi diktofondy jasyrǵannan keiin Borispol halyqaralyq áýejaiyna bortserik bolyp jumys isteitin áielin kútip alýǵa kelgenin aitty.
Ol áýe kemesiniń apatqa ushyraǵanyn tikelei efirge shyqqan telearnalardyń biriniń jýrnalisinen áýejaida estigen. Er adam jylap jiberdi. Ol "Ýkrainanyń halyqaralyq áýe jelilerine" habarlasýǵa tyrysqanmen, ol jerden resmi aqparat ala almady. Áýe kompaniiasy ushaq apaty jaily málimetke túsinikteme bermei otyr.
Irandaǵy áýe apatyna bailanysty Ýkrainanyń ulttyq qaýipsizdik jáne qorǵanys keńesi janynan jedel shtab quryldy. Naqtylanǵan málimetter boiynsha, bortta 179 adam bolǵan.
Ýkrainalyq ushaq sársenbi kúni tańerteń Tegeran halyqaralyq áýejaiynyń mańynda qulady.
Ýkrainanyń syrtqy ister ministrligi apatqa qatysty aqparatty rastady. Al el prezidenti Vladimir Zelenskii apatta qaza bolǵandardyń otbasylary men jaqyndaryna kóńil aitty.
