Iran Ýkraina mamandaryna Tegeran áýejaiy mańynda qulaǵan ushaqtan tabylǵan "qara jáshikti" tapsyrdy. Bul aqparatty Ýkrainanyń syrtqy ister ministri Vadim Pristaiko 10 qańtar kúngi brifing kezinde aitty.
"Ushaq detaldary qolymyzǵa tidi, bizdi ushaq qulaǵan orynǵa da kirgizdi. "Qara jáshikti" alǵan mamandarymyz jaqyn arada [ekipaj músheleriniń] sózin qalpyna keltire bastaidy. Bizde sonymen birge Tegeran áýejaiynyń ushýdy basqarý ortalyǵyndaǵy dispetcherler men ushqyshtar arasynda bolǵan jazba da bar. Bul aqparattyń bári ázirge zerttelip jatyr" dedi Ýkrainanyń syrtqy ister ministri.
Ol sonymen birge ushaq apatynan qaza bolǵandardyń týystarynan DNQ úlgileri jinalǵanyn da aitty. Ushaq apatyn zerttep jatqan Ýkraina delegatsiiasynyń quramynda 50 adam bar.
8 qańtarda Tegeran áýejaiynan Kievke ushyp shyqqan "Ýkrainanyń halyqaralyq áýe jelisi" kompaniiasyna tiesili "Boeing-737-800" ushaǵy qulady. Ushaqta bolǵan 176 adam: 167 jolaýshy jáne 9 ekipaj múshesiniń bári qaza boldy. Dál sol kúni birneshe saǵat buryn Iran AQSh-tyń Iraktaǵy áskeri bazalaryn zymyranmen atqylaǵan.
9 qańtarda halyqaralyq aqparat agenttikteri AQSh úkimetindegi qupiia derekkózge súiene otyryp, ushaqty irandyq zymyran qatelesip atyp túsirgen bolýy múmkin dep habarlady. Kanadanyń premer-ministri Djastin Triýdo da dál solai dep málimdedi.
Al, búgin buǵan deiin birneshe kún boiy batys jetekshileri men sarapshylarynyń "ushaqty irandyq zymyran atyp túsirdi" degen málimdemesin joqqa shyǵaryp kelgen Iran ýkrainalyq ushaqty "qatelesip" atyp túsirgenin moiyndady.
VIDEO: Batys "Ýkraina ushaǵyna Iran zymyrany tigen" deidi. Tegeran munymen kelispeidi (10 qańtar 2020 jyl).
