Foto: aa.com.tr
Iran Ýkrainanyń Qyrym men taǵy tórt óńiriniń anneksiialanǵanyn moiyndamaidy, dep málimdedi Iran syrtqy ister ministri Hýsein Ámir Abdollahiian TRT World túrik telearnasyna bergen suqbatynda.
"Biz memleket egemendigi men aýmaǵynyń tutastyǵyn halyqaralyq zańdar boiynsha tanimyz. Tegeran men Máskeý qarym-qatynasy jaqsy ekenine qaramastan, Qyrymnyń, Lýgansk men Donetsk oblystarynyń Ýkrainadan bólinýin moiyndamadyq", – dep málimdedi Abdollahiian.
Onyń aitýynsha, Iran biligi syrtqy saiasatta "birizdi ustanymynan" ainymaidy.
"Ýkrainadaǵy janjal - sheshim emes dep málimdegen ýaqytta biz saiasi ustanymymyzdyń durys ekenine senimdimiz" - deidi ministr.
Munyń aldynda aqparat quraldary Resei Ýkrainadaǵy soǵysta qoldanyp júrgen drondaryn Irannan alady dep birneshe ret habarlaǵan. Kiev Máskeýdi Iran drondaryn azamattyq nysandardy shabýyldaýǵa qoldandy dep aiyptap otyr.
2022 jylǵy qarashada Iran Reseige áskeri dron bergenin alǵash ret moiyndady, biraq olardy Ýkrainadaǵy soǵys bastalǵanǵa deiin jetkizgenin aitty. Resei Iran qarýyn qoldandy degen aiyptaýdy joqqa shyǵaryp otyr.
Eske salaiyq, Resei Qyrymdy 2014 jyly anneksiialady. 2022 jylǵy qyrkúiekte prezident Vladimir Pýtin Ýkrainanyń Herson, Zaporoje, Donetsk jáne Lýgansk oblystaryn anneksiialaǵanyn jariialady.
Kiev pen Batys elderi anneksiiany eshqashan moiyndamaitynyn aldyn ala málimdegen. Ýkraina Resei basyp alǵan jerlerdi qaitarý úshin qarýmen kúresetinin eskertken.
Venesýela, Soltústik Koreia jáne Siriia Qyrym anneksiiasyn moiyndaǵan. Byltyr qyrkúiektegi psevdoreferendýmnan keiin Resei biligi Ýkrainanyń tórt oblysyn jaýlap alǵanyn málimdegen soń, Soltústik Koreia Ýkrainanyń tórt oblysynyń anneksiialanǵanyn qoldaǵan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
