Foto: Aqorda
Qazaqstan men Iran prezidentteriniń kelissózi eki el delegatsiialarynyń qatysýymen keńeitilgen quramda jalǵasty, dep habarlaidy Ult.kz.
Masýd Pezeshkian iran-qazaq qatynastary tereńnen tamyr tartatynyna toqtaldy.
"Qazaqstanmen aradaǵy taýar ainalymy 40 paiyzǵa artty. Bul – óte jaqsy kórsetkish. Budan buryn ózara saýda-sattyqty 3 milliard dollarǵa deiin jetkizýge ýaǵdalasqan edik. Osy kelisimdi júzege asyrýǵa kúsh sala beremiz. Sonymen qatar Iran Islam Respýblikasy men Eýraziialyq ekonomikalyq odaq arasynda jasalǵan erkin saýda kelisimi eki eldiń saýda-ekonomikalyq bailanystaryn keńeitýge berik negiz qalaidy", – dedi Iran Prezidenti.
Óz kezeginde Qasym-Jomart Toqaev Qazaqstan Iranǵa jalpy quny keminde 200 million dollar bolatyn taýar tasymaldaýǵa daiyn ekenin aitty.
Kelissóz barysynda saýda-ekonomika, investitsiia salalaryndaǵy yqpaldastyq perspektivasy qarastyryldy.
"Ózara taýar ainalymy jyldan jylǵa artyp keledi. Degenmen saýda-sattyqty ártaraptandyrý máselesin oilastyrý kerek. Ásirese, aýyl sharýashylyǵy, kólik-logistika, taý-ken, óndiris, meditsina jáne ozyq tehnologiialar salalaryndaǵy qarym-qatynasty jandandyrý qajet. Búgin qol qoiylatyn qujattar saiasi jáne ekonomikalyq alys-beristi damytýǵa tyń serpin beredi dep senemin", – dedi Memleket basshysy.
Qasym-Jomart Toqaev Tegeranda Qazaqstannyń Saýda úiin ashý bastamasyna qoldaý bildirip, Iskerlik keńestiń jumysyn jandandyrýdyń, Qazaqstan-Iran birlesken saýda-ónerkásip palatasynyń áleýetin tolyq paidalanýdyń mańyzyn atap ótti.
Jyl basynan beri Iran Qazaqstan ekonomikasyna 17,8 million dollar tikelei investitsiia salǵan.
Iran kásipkerleri Almaty oblysynda irimshik zaýytyn, Batys Qazaqstan oblysynda mal terisin óńdeý kombinatyn ashý sekildi jobalarǵa belsene atsalysyp jatyr.
Qazaqstan biznesmenderi de Iran naryǵynda birqatar jobany júzege asyrýda.
Taraptar Soltústik – Ońtústik kólik dálizi men Qazaqstan – Túrikmenstan – Iran temir jolynyń áleýetin odan ári arttyrýǵa múddeli ekenin jetkizdi.
Biylǵy 10 aidyń nátijesi boiynsha atalǵan baǵyttarmen tasymaldanǵan júktiń kólemi ótken jylmen salystyrǵanda 53 paiyzǵa artqan.
Prezidentter aimaqaralyq bailanysty kúsheitý úshin kólik-tranzit joldaryn odan ári ártaraptandyrý, ásirese, Kaspii teńizindegi port infraqurylymyn birlese damytý máselelerin talqylady.
Budan bólek, kelissózde aýyl sharýashylyǵy, energetika, taý-ken, tsifrlandyrý jáne jasandy intellekt salalarynda birlesken jobalardy iske asyrý perspektivasyna nazar aýdaryldy.
