kórneki foto: secretmag.ru
20 otandasymyz Irak Respýblikasynda zańsyz eńbek etken. Qazaqstan elshiligi ustalǵan jerlesterimizdi sottyń qaraýynsyz deportatsiialaý týraly kelisimge qol jetkizgen. Bul týraly Syrtqy ister ministrliginiń resmi ókili Aibek Smadiiarov málim etti, dep habarlaidy QazAqparat.
«Biyl naýryz aiynyń sońynda Irak Respýblikasynyń quqyq qorǵaý organdary zańsyz eńbek qyzmetin júzege asyrǵany úshin Qazaqstannyń 20 azamatyn ustady. Qazaqstannyń Iordaniiadaǵy jáne Iraktaǵy elshiligi jergilikti organdarmen sot qaraýynsyz deportatsiialaý týraly ýaǵdalastyqqa qol jetkizdi. Qazir ustalǵan azamattar aiyppul tólep Iran aýmaǵynan shyǵyp ketti», - dedi Aibek Smadiiarov ministrlikte ótken baspasóz máslihatynda.
Onyń aitýynsha, buǵan deiin de osyǵan uqsas oqiǵa bolǵan.
«Biyl aqpanda Qazaqstannyń 7 azamaty Irak Respýblikasynyń sheteldikterdiń bolýy týraly zań normalaryn buzǵany týraly, atap aitqanda, jasyryn kazinoda zańsyz eńbek etkeni úshin tergeýge tartylǵan bolatyn. Bizge málim bolǵandai, ótken jyldyń qarasha aiynda olardyń 5-i ustalyp, sot qaraýyna deiin kepilmen bosatylǵan. Osyǵan qaramastan jerlesterimiz Irakka qaita oralyp, eldiń zańnamasyn qaitadan buzdy. Qazaqstan elshiligi shuǵyl kómek kórsetýdi uiymdastyrǵan. Sondai-aq, sot jáne prokýratýramen kelissózder ótti», - deidi ol.
Sondai-aq, Smadiiarovtyń aitýynsha, joǵaryda atalǵan zańbuzýshylyq úshin bir jylǵa deiin bas bostandyǵynan aiyrýy nemese 500 myńnan 3 mln irak dinaryna deiin aiyppul salynýy múmkin.
«Atalǵan azamattar Irak Respýblikasyna tiisti qujatsyz jáne zańsyz eńbek etý maqsatynda barǵany belgili boldy. Osy oraida otandastarymyzdy basqa eldiń zańnamasyn saqtaýǵa shaqyramyz», - deidi SIM resmi ókili.
