Iraktyń Erbil qalasynda Túrkiianyń diplomattaryna qarýly shabýyl jasaldy. Túrkiianyń Iraktaǵy bas konsýldyǵynyń qyzmetkeri qaza tapty, dep habarlaidy Anadolý agenttigi.
Agenttiktiń deregine qaraǵanda, oqys oqiǵa meiramhanada bolǵan. Meiramhana iesiniń aitýynsha, diplomattar kire bergende azamattyq kiim kigen qaskói eki tapanshamen oq jaýdyrǵan.
Túrkiianyń bir diplomaty sol jerde jan tapsyrǵan.
Erbil politsiiasynyń bastyǵy Abdýlhalik Talat osy is boiynsha tergeý bastalǵanyn jetkizdi. Ári egjei-tegjeili aqparat keiinirek habarlanatynyn aitty.
Qazir Erbilden shyǵatyn joldardyń barlyǵy jabylǵan, shabýyl jasaǵan adamdy politsiia izdep jatyr.
