Iraktyń qaýipsizdik kúshteri Baǵdadta bilikke qarsy narazylyqqa qatysqan - keminde alty adamdy, Basra qalasynda tórt adamdy atyp óltirdi.
Densaýlyq saqtaý salasyndaǵy qupiia derekkózdiń habarlaýynsha, 7 qarashada politsiiamen qaqtyǵysta ondaǵan adam jaralanǵan. Beisenbi kúni narazylar saiasi elitany bilikten bas tartýǵa májbúrlep, qyspaqqa alǵan.
Baǵdadta Shýhad kópiri aýmaǵynda politsiia narazylarǵa oq atyp, shamamen 35 adam jaralanǵan. Politsiia úkimet pen elshilikterdiń ǵimaraty ornalasqan erekshe qorǵaýdaǵy "Jasyl aimaqqa" ótýge tyrysqan narazylardyń jolyn japqan.
Iraktyń munaily óńiri Basra qalasynda politsiia birneshe aptadan beri qarsylyq aktsiiasyn jalǵastyryp jatqan narazylarǵa oq atyp, keminde tórt adam óldi. Iraktyń ózge aýdandarynda da qaqtyǵys bolǵany habarlandy.
Irakta bilikke qarsy aktsiialar birneshe apta buryn bastalǵan. Narazylyq bastalǵaly beri 200-den astam adam qaza tapqan. Narazylyqqa munaiǵa bai memlekettegi jemqorlyq, jumyssyzdyq pen qoǵamdyq qyzmet sapasynyń nasharlyǵy sebep boldy. Irak biligi narazylardyń talaptaryn eskerýge ýáde berip, narazylarǵa artyq kúsh qoldanǵanyn moiyndaǵan.
