Jumys isteýge nietti kásiporyndarǵa basqarma men jaýapty qurylymdar tarapynan qoldaý joq. Búgin Jambyl oblysynyń ákimi Berdibek Saparbaev apparattyq keńes ótkizip, Kásipkerlik jáne indýstrialdy-innovatsiialyq damý basqarmasynyń jumysyna qatysty syn aitty.
Oblys ákimdiginiń resmi saitynda málim etilgendei, keńes barysynda óndiris pen tutyný arasyndaǵy tepe-teńdikti saqtaý, veterinarlyq qaýipsizdik jáne ideologiialyq jumystar barysy qaraldy.
B.Saparbaev Kásipkerlik jáne indýstrialdy-innovatsiialyq damý basqarmasy basshysynyń mindetin atqarýshy Jandáýlet Kenjebekovtiń baiandamasyn ortasynan toqtatýǵa májbúr boldy.
«Maǵan basqa salalardaǵy shyǵyndarymyzdy almastyratyn ónim túrlerine taldaý qajet. Paidaly qazbalar boiynsha zerdeleý sharalaryn uiymdastyryp, olardy igerý úshin investorlardy jedel tartý qajet. Kóptegen kásiporyndar jumys isteýge, ónim kólemin arttyrýǵa niet bildirip otyr, alaida basqarma men basqa da jaýapty qurylymdar tarapynan qoldaý joq. Sizdiń basty mindetimiz –indýstriiany, kásipkerlikti damytý máselelerimen ainalysý.
Daǵdarys – bul jańa múmkindikter ýaqyty, ony paidalanbaý aqymaqtyq bolar edi. Óndiris pen tutyný arasyndaǵy balansty júzege asyrý joldaryn izdeý, óndiristik kúshterdi ornalastyrý shemasyn qurý qajet. Ekonomikada jeńil, tamaq jáne qaita óńdeý ónerkásibiniń úlesin arttyrý joldaryn oilastyrý kerek», - dedi aimaq basshysy.
Atap ótilgendei, memlekettik satyp alý boiynsha ótkiziletin konkýrstardy negizinen jergilikti kásiporyndar utýda. Bul tek ekonomika úshin ǵana emes, áleýmettik sala úshin de oń áser etip otyr. Salyq jergilikti biýdjetke túsedi, al jańa jumys oryndarynda jergilikti turǵyndar eńbek ete bastaidy.
«Tek biýdjetke ǵana qarap otyrýǵa bolmaidy, basqa da qarjylandyrý kózderin belsendi túrde izdestirý kerek. Demeýshilermen jumys isteý, tikelei investitsiialar tartý, memlekettik-jekemenshik áriptestikti damytý. Aýdan ákimderi sharýa qojalyqtarynyń mineraldyq tyńaitqyshtaryn satyp alýy, óndiriletin asfalttyń, basqa da qurylys materialdarynyń sapasyn baqylaýda ustaýy qajet. Barlyq jaǵdai jasalǵan, aqsha aýdaryldy, tek jumys isteńizder. Men salynyp jatqan nysandardyń sapasyn jeke ózim tekseretin bolamyn.
Bos jinalystardyń sanyn qysqartyp, kásiporyndarǵa jii barý kerek. Jaýapty tulǵalar tarapynan berilgen tapsyrmalardyń iske asyrylýyna taldaý men baqylaý az», - dep atap ótti Berdibek Saparbaev.
Sondai-aq Aýyl sharýashylyǵy basqarmasynyń basshysy Berik Nyǵmashev baiandama jasap, un, makaron, jumyrtqa jáne sary mai óndirisin eki esege ulǵaitý úshin jergilikti resýrstar jetkilikti ekendigin atap ótti. Bir ai ishinde qaita óńdeý kásiporyndarynyń áleýetine monitoring júrgizilip, azyq-túlik taýarlaryn óndirý men tutyný arasyndaǵy balansty saqtaý jóninde usynystar ázirlenbek.
Óńir basshysy kókónis saqtaý qoimalarynyń jai-kúiine zerdeleý júrgizýdiń mańyzdylyǵyna toqtalyp, qajet bolǵan jaǵdaida memlekettik-jekemenshik áriptestik negizinde jańa qurylys salý kerektigine kóńil bóldi. Bul jumystarǵa tartý úshin biznes ókilderi arasynda túsindirý jumystaryn júrgizý qajet. Aýdan ákimderi tiisti jer telimderin barynsha qysqa merzimde bólýdi qarastyrǵany abzal.
Ekonomika jáne biýdjettik josparlaý basqarmasynyń basshysy Gúldana Jaýynbekova habarlaǵandai, aǵymdaǵy jyldyń birinshi toqsanynyń qorytyndysy boiynsha tamaq ónerkásibi 47,4 paiyz, himiia ónerkásibi 8,8 paiyzǵa tómendegen. Birinshi jaǵdaidaǵy quldyraý kórsetkishi qant zaýyttaryn toqtaiyna bailanysty oryn alǵan.
Baiandamashy joǵaryda atalǵan salalardaǵy shyǵyndardyń ornyn tolyqtyra alatyn ónimderdiń tizbesi men kólemin tilge tiek etip, sonyń ishinde qurylys, qurylys materialdary men metaldar óndirisine nazar aýdartty.
