Jyldyń toǵyz aiynda taý-ken óndirý ónerkásibinen tys kapitalǵa investitsiialardyń ósý qarqyny 15,1% boldy. Úkimet otyrysynda toǵyz aidaǵy ekonomikanyń ósimi týraly esep bergen QR Ulttyq ekonomika ministri Áset Erǵaliev osyndai derekter keltirdi, dep habarlaidy QazAqparat.
«Ekonomikalyq ósýdiń mańyzdy faktory ishki jáne syrtqy investitsiialardy tartý bolyp otyr. Onyń ishinde qomaqty investitsiialardy óndirýshi emes salalarǵa tartý baiqalýda.
Jyldyń toǵyz aiynda taý-ken óndirý ónerkásibin esepke almaǵanda negizgi kapitalǵa investitsiialardyń ósý qarqyny 15,1% qurady.
Investitsiia qurylys salasynda – 1,3 ese, óńdeý ónerkásibinde – 80,6%, saýdada – 37,8%, aýyl sharýashylyǵynda – 36,7%, aqparat jáne bailanysta – 14,3%, jyljymaityn múlikpen operatsiialar salasynda –18,9% jáne qarjy salasynda – 15,6% ósti», - dedi Áset Erǵaliev.
Onyń málimeti boiynsha, óńirler arasynda eń joǵarǵy kórsetkish Shymkent, Almaty qalalarynda jáne Aqtóbe, Soltústik Qazaqstan oblystarynda baiqalyp otyr.
«Biylǵy qańtar-tamyzda syrtqy saýda taýar ainalymy 62,8 mlrd AQSh dollaryn, onyń ishinde eksport boiynsha kórsetkish 37,5 mlrd AQSh dollaryn qurady. Bul rette, óńdelgen taýarlar eksporty 23,2% artyp, 12,1 mlrd AQSh dollaryna deiin jetti», - dedi ministr.
