Tutynýshylardyń quqyqtaryn qorǵaý komitetiniń tóraǵasy Almaz Ábjapparovtyń aitýynsha, eldegi internet-dúkender qazaqstandyqtarǵa 7 mln teńgege jýyq aqshasyn aiqaryp bergen, dep habarlaidy QazAqparat.
«2021 jyldyń alǵashqy jartyjyldyǵynda internet-dúkenderdiń qyzmetine 573 qazaqstandyq shaǵymdanǵan. Sol shaǵymdar negizinde tutynýshylarǵa shamamen 7 mln teńge qaitaryldy. 2020 jyldyń birinshi jartyjyldyǵynda 98 adam shaǵymdanǵan bolatyn. Ol kezde qaitarylǵan aqshanyń kólemi 1,4 mln teńge edi. Azamattardyń bizdiń komitetke aryz jazýyna túrli jaittar sebep bolady. Taýardy aiyrbastaýdan nemese qaitarýdan bas tartý (175 ótinish), sapasyz taýar usyný (118 ótinish), ózge máseleler boiynsha (280 ótinish) shaǵymdar túsedi», - dedi Almaz Ábjapparov Saýda jáne integratsiia ministrliginiń alqa májilisinde.
Atalmysh sharada Almas Abjapparov jalpy komitetke jyl basynan beri tutynýshylardan 8 myńǵa jýyq shaǵym túskenin aitqan bolatyn.
Bul byltyrǵy kórsetkishpen salystyrǵanda 144 paiyz kóp.
Vedomstvo ókili tutynýshylardyń quqyqtaryn qorǵaý salasyndaǵy problemalar jańa zańnamalyq ózgerister engizýdi talap etetinin atap ótti. Osyǵan bailanysty 2021 jyly Komitet Zańǵa túzetýlerdiń 2-paketin ázirleýge kiristi. Komitet ázirlegen joba tujyrymdamasy 2021 jylǵy 25 maýsymda tutynýshylardyń quqyqtaryn qorǵaý jónindegi vedomstvoaralyq keńestiń birinshi otyrysynda talqylandy, al 30 maýsymda tujyrymdama Ashyq NQA portalynda talqylaý úshin ornalastyrylǵan.
