QR IIM Kriminaldyq politsiia departamenti bastyǵynyń orynbasary Qanat Nurmaǵambetov internet-alaiaqtardan qorǵaný joldaryn aitty, dep habarlaidy QazAqparat.
«Internet-alaiaqtyqtan qorǵanýdyń qarapaiym is-sharalaryna toqtalyp, birqatar usynys aita keteiin. Ózińizdiń jeke málimetterińizdi, plastik kartańyzdyń rekvizitterin eshkimge aitpańyz. Aýdarymdar týraly túbirtekti, kodyńyz ben qupiia sózińizdi tipti bank qyzmetkerine de, politsiiaǵa da bermeńiz. Belgisiz jáne tekserilmegen saittarǵa jeke málimetterińizdi senip engizbeńiz. Tekserip almai, tólem jasamańyz. Tólemdi taýar alǵannan keiin aýdarýǵa kelisýge tyrysyńyz», - dedi ol IIM baspasóz alańynda ótken brifingide.
Onyń atap ótýinshe, kúdik týdyratyn mámilelerge aqsha aýdarmaý, tabys kózi belgisiz qarjylyq syzbalardan saq bolý kerek. Qosymshalardy ornatý barysynda App store men Play Market-tiń resmi derekkózderin qoldanǵan jón.
«Banking qyzmetterine kirýge arnalǵan qupiia sózdi únemi aýystyryp turý, 3D-qorǵanysty jáne bankter usynatyn ózge de qaýipsizdik is-sharalaryn qoldanyńyzdar. Óz esepshottaryńyzdy, aqsha qozǵalysyn únemi tekserip otyryńyz. Mundai is-sharalar alaiaqtardan jaltarýǵa jáne aqshańyzdy saqtaýǵa múmkindik beredi», - dedi Qanat Nurmaǵambetov.
