Jambyl oblysynda Instagram arqyly áielder kiimine tapsyrys qabyldap, jeli qoldanýshylarynan 2 mln teńgeden astam aqsha aldap alǵan azamatshaǵa sot úkim shyǵardy, dep habarlaidy "Ult aqparat".
Ishki ister ministrligi Tergeý departamentiniń bastyǵy Sanjar Ádilovtiń aitýynsha, kúdikke ilingen azamatsha - 1995 jyly týǵan Jambyl oblysynyń turǵyny.
«Onyń ońai aqsha tabý úshin Instagram arqyly áielder kiimine tapsyrys qabyldap, oryndamaǵany belgili boldy. Áleýmettik jelide satylatyn kiimderdiń katalogyn jariialaityn akkaýnt ashyp, jalǵan habarlandyrý ilgen. Onyń qolynda habarlandyrýda kórsetilgen taýardyń eshbiri bolmaǵan. Sóite turyp, taýardyń baǵasyn 100 paiyz kóleminde aldyn ala tólem qabyldap, kýrer arqyly joldaýǵa ýáde bergen. Kýrerlik qyzmet tapsyrysty bir aptanyń ishinde jetkizetinin paidalanyp, birneshe kún boiy alaiaqtyǵyn esh kedergisiz jalǵastyryp kelgen», - deidi IIM ókili.
Osy ýaqyt ishinde kúdiktiniń quryǵyna 40-tan astam adam ilingen.
«Kúdiktiniń qylmystyq áreketiniń kesirinen 40-tan astam adam aldanǵan. Materialdyq shyǵynnyń jalpy kólemi 2 mln teńgeden asady. Qylmystyq is sotqa joldanyp, sot úkimimen azamatsha 3,5 jylǵa bas bostandyǵynan aiyryldy», - dedi Sanjar Ádilov.
