Nur-Sultan qalasynyń Kópsalaly meditsinalyq ortalyqtyń infektsionist dárigeri Gúlnár Nájimova halyqtyń esine taǵy da qaýipsizdik sharalaryn saqtanýǵa shaqyrdy. Maman buǵan deiingi dárigerlerdiń keńesine ún qosyp, jabyq nysandar men buqara kóp jinalatyn oryndarǵa barmaý kerektigin eskertedi, dep habarlaidy QazAqparat.
«Kóp adam jeldetilmeitin oryndarda bir-birine jaqyn jinalyp qalsa, koronavirýs infektsiiasynyń taralý qaýpi ulǵaia túsedi. Mundai jaǵdaida virýstyń tamshy túrinde taralý qaýpi joǵary. Sol sebepti azamattardyń nysan ishinen qaraǵanda syrtta kezdesýi virýstyń taralýyn edáýir tómendetedi. Jabyq nysandar men buqara kóp jinalatyn oryndarǵa barmaýǵa keńes beremiz», - dedi Gúlnár Nájimova OKQ alańynda ótken baspasóz máslihatynda.
Infektsionist maman buǵan deiin dárigerler aityp kele jatqan gigienanyń qarapaiym erejesin esten shyǵarmaý kerektigin eskertedi.
«Qoldy spirtpen súrtip, sabynmen jýý kerek. Osylaisha qolǵa mikrob juqpaidy. Múmkindiginshe kózdi, aýzyńyzdy qolmen ustamańyz. Azamattar kóbinese qolymen kez kelgen zatty ustaǵandyqtan, virýs qaldyqtarynyń aǵzaǵa ený yqtimaldyǵy joǵarylai túsedi. Qolǵa qonǵan virýs kózge nemese muryn, aýyzǵa jetip, sol arqyly aǵzaǵa jetýi yqtimal. Túshkirgende nemese jótelgende murnyńyzdy qolmen jappaýǵa tyrysyńyz. Qoldanylǵan sýlyq oramaldy birden laqtyryp otyrý kerek. Adamdar kóbirek qol tigizetin zattardyń, esiktiń tutqasyn, krandyń, uialy telefonnyń ekranyn árdaiym dezinfektsiialap otyryńyz», - dedi ol.
Gúlnár Nájimova ár adamnyń qyzýy kóterilip, jóteli paida bolsa, álsizdikti sezse birden dárigerge júginýi kerektigin eskertedi. Sonymen qatar koronavirýs juqtyrǵan adamnyń iis sezý qabileti tómendep, basy, tamaǵy aýyrýy múmkin.
«Aýrýdyń belgileri álsiz bolsa da azamattar úiinde qalyp, tolyqqandy jazylyp shyǵýy úshin oqshaýlanýy tiis. Turǵylyqty mekeni boiynsha emhanaǵa habarlasqany jón», - deidi ol.
Eske sala ketsek keshe Nur-Sultan qalasy koronavirýs taralýynyń joǵary bolýyna bailanysty «qyzyl» aimaqta qalyp otyrǵany habarlanǵan bolatyn. Sonymen qatar «sary» aimaqta atalǵan óńirden basqa Almaty qalasy, Shyǵys Qazaqstan, Soltústik Qazaqstan, Aqmola jáne Atyraý oblystary jatyr.
